81 миллион теңге: Ақтауда киіз үйге жарияланған тендер тоқтатылды

Ақтауда қымбат бағалы киіз үйлерге жарияланған тендер тұрғындар наразылығынан кейін тоқтатылды, - деп хабарлайды Malim.kz Lada.kz басылымына сілтеме жасап. 

Маңғыстау облысының тұрғындары әлеуметтік желілерде облыс әкімдігі жариялаған 12 киіз үйді 81 миллион теңгеге сатып алу бойынша тендерге наразылық білдірген. Олар бұл қаражатты жол мен тротуар жөндеуге, қоқыс шығаруға және ұзақ уақыт бітпей тұрған құрылыс нысандарын аяқтауға жұмсауға болатынын айтты.

"Ертең мейрамнан кейін бұл киіз үйлер қоймада шіріп жатады. Қаланың барлық мәселесі шешіліп қойды ма? Неге тазалыққа, абаттандыруға және жаңа тұрғын үйлерді тексеруге көңіл бөлінбейді? Тұрғын үй-коммуналдық шаруашылық бөлімі қаланың жағдайын бақылауға тиіс, бірақ олар өз міндеттерін орындамайтын сияқты", – деп жазған әлеуметтік желі қолданушылары.

Ақтау қалалық тұрғын үй-коммуналдық шаруашылық бөлімінің басшысы Жанболат Жақұпов мәселеге қатысты пікір білдірді. Оның айтуынша, киіз үйлер 2025 жылы Ақтаудың Түркі әлемінің астанасы атануына байланысты іс-шараларды өткізу үшін қажет болған. 

"Көршілес елдерден көп қонақ келеді деп күтіледі, сондай-ақ ұйымдастыруға қойылатын талаптар жоғары, өйткені іс-шаралар тек қала немесе Маңғыстау облысы атынан емес, жалпы Қазақстанды таныстыру мақсатында өткізіледі. Сатып алуға жоспарланған киіз үйлер заманауи талаптарға сай, эстетикалық тұрғыдан әдемі көрінуі керек. Алайда әлеуметтік желі қолданушылары ұсынған киіз үйлер белгіленген стандарттарға сәйкес келмейді. Қазір тендерлік рәсім ресми түрде тоқтатылды", – деді Жанболат Жақұпов.

Фото: Pixabay.com