Қазақстанда екі әуе компанияға айыппұл салынды

Жолаушылар құқығын бұзғаны үшін қазақстандық әуе компаниялар әкімшілік жауапкершілікке тартылды, деп хабарлайды Malim.kz.

Жазғы кезеңде рейстер санының ұлғаюына байланысты ҚР заңнамасында көзделген қызметтерді уақытылы көрсетпеу немесе рейсті кешіктіру кезінде қызметтерді көрсетпеу туралы әуе компанияларға жолаушылардың шағымдары жиілеп кетті. Осыған байланысты Көлік министрлігінің Азаматтық авиация комитеті рейстердің кешігуі кезінде қызметтерді тиісінше ұсыну бөлігінде Қазақстанның қолданыстағы заңнамасының талаптарын бұзғаны үшін отандық және шетелдік әуе компанияларды жауапкершілікке тарту бойынша жұмысты жалғастырып жатыр, деп мәлімдеді Көлік министрлігі.

Мәселен, Алматы – Қарағанды бағыты бойынша рейс кідіртілген кезде қызметтерді ұсынбауға байланысты 11 шілдеде FlyArystan әуе компаниясына әкімшілік құқық бұзушылық туралы заңның 567-бабының 2-бөлігі бойынша хаттама толтырылды. Оған сәйкес компанияға 1 000 АЕК айыппұл салынды, –делінген ақпаратта.

Бұған дейін, сондай-ақ Атырау-Алматы бағыты бойынша рейсті кешіктірген кезде тиісті қызмет көрсетпегені үшін биылғы жылдың 24 маусымында SCAT әуе компаниясы әкімшілік жауапкершілікке тартылып, айыппұл 1 000 АЕК-ті (3 692 000 теңге) құрады.

Фото: BAQ.KZ