«ҚазМұнайГаз»-да ауыс-түйіс болды: Мырзағалиевтің орнына Хасенов келді
«Самұрық-Қазына» қорының басшысы Нұрлан Жақыпов Мағзұм Мырзағалиевке ҚМГ басшысы ретінде атқарған қызметі үшін алғыс айтты.
Асхат Хасенов «ҚазМұнайГаз ҰК» АҚ басқарма төрағасының міндетін атқарушы болып тағайындалды, деп хабарлайды Malim.kz.
«Самұрық-Қазына» қорының басшысы Нұрлан Жақыпов ұжымды ұлттық компания акционерлерінің кезектен тыс жалпы жиналысы өтетін күнге дейін «ҚазМұнайГаз» ҰК» АҚ басқарма төрағасы міндетін атқару жүктелген Асхат Хасеновпен таныстырды.
Жақыпов сонымен қатар Мағзұм Мырзағалиевке ҚМГ басшысы ретінде атқарған қызметі үшін алғыс айтты.
Асхат Хасенов туралы не белгілі?
Қаныш Сәтбаев атындағы Қазақ ұлттық техникалық университетін «Мұнай және газ ұңғымаларын бұрғылау» мамандығы бойынша, Халықаралық бизнес университетін «Менеджмент» мамандығы бойынша бітірген.
Еңбек жолын 2005 жылы «Торғай Петролеум» АҚ мұнай-газ өндіру цехында 3-разрядты оператор болып бастады. Осы жылдар ішінде мемлекеттік органдарда жауапты қызметтер атқарды.
2022 жылғы қаңтардан 2024 жылғы мамырға дейін Қазақстан Республикасы Энергетика вице-министрі қызметін атқарды. «Құрмет» орденімен марапатталған.
Фото: интернеттен
