Ақтөбе облысының әкімі көпбалалы анаға жалған сертификат сыйлаған.
«Астана» телеарнасының мәліметінше, 1 наурыз (алғыс айту) күні көпбалалы ана Айсұлу Қүздібаеваға облыс әкімі Оңдасын Оразалин 2 миллион теңгенің сертификатын табыстаған. Бірақ ана көрсетілген сомманы ала алмаған, ол тек қағаз жүзінде берілген.
Айсұлу Қүздібаеваның сөзінше, ол 2 миллион теңгенің үстіне тағы да ақша қосып, басқа үй сатып алмақ болған.
«Облыс әкімінің өзі берді. Мен 2 миллион теңге менде бар екен деп ойладым. Үстіне тағы ақша жинап, басқа баспана сатып аламын дегенмін. Көршілерім де келіп құттықтаған. Бұл жәй қағаз болып шықты», - дейді Қүздібаева.
Айсұлу Қүздібаева Ақтөбеге жақында көшіп келген. Ол бес баласымен бірге 14 шаршы метрлік коммуналды пәтерде тұрып жатқан. Үйде жиһаз да болмаған. Оған еріктілер көмектесіп, пәтерді жөндеуден өткізіп, жиһаз алып берген.
Шенеуніктер көп балалы анаға берілген сертификаттың ешқандай құны жоқ екенін бұған дейін түсіндіргендерін айтады. Қазақстан халқы Ассамблеясының Ақтөбе облыстық секретариятының меңгерушісі Маржан Қорғанбаеваның сөзінше, сертификат еріктілер бөлмені жөндеуге және жиһаз сатып алуға жұмсаған қаржыға негізделіп берілген.
«Біз жастардан: «жөндеуге қанша қаржы жұмсадыңдар?», - деп сұрадық. Олардың сөзінше, жөндеу жұмыстары мен жиһазға 2 миллионға жуық қаржы кеткен. Көмек жасалған сомманы көрсету үшін Айсұлуға осы сертификатты табыстадық. Ол:«бұл қаржыны маған бере ме?» - деп сұрады. Біз бұл соммаға жөндеу жұмыстары жасалғанын, осыны көрсеткіміз келгенін түсіндірдік», - дейді Қорғанбаева.
2020 жылдың маусым айында президент Қасым-Жомарт Тоқаев "коронавирус індетіне қарсы жұмыстарға атүсті қарады" деген бірқатар әкім мен министрге сөгіс жариялаған. Олардың арасында Ақтөбе облысының әкімі Оңдасын Оразалин де болған.
Байланысты жаналықтар
MalimBlocks
