Ауыс-түйіс: Босаған 13 сенатордың 4-уі қайта оралды
Мемлекет басшысы бүгін 13 сенатордың өкілеттілігін тоқтатты.
Қысқарғандар қатарында Назарбаевқа университет ашып берген бұрынғы білім және ғылым министрі Бақытжан Жұмағұлов, қаржы полициясын басқарған уағында «тапсырыспен іс қозғаушы» деген сөзге қалған Қайрат Қожамжаров, ісінен сөзі жүйрік экс-әкім, экс-министр Мұхтар Құл-Мұхаммед, Назарбаевтың жерлесі, Ресей батыры, екінші ғарышкер Талғат Мұсабаев сияқты заманында ақ дегендері алғыс, қара дегендері қарғыс болған жандар бар. Назарбаев дәуірінде дәурені жүрген бұларға алдағы уақытта қандай мансап бұйыратыны әзірге белгісіз.
Президент жарлығымен сенатор орынын босатып, қайта оралғандар да бар. Олар Мәулен Әшімбаев, Нұртөре Жүсіп,
Ләззат Қалтаева, Асқар Шәкіровтер. Сондай-ақ, Жоғарғы соттың экс-төрағасы Жақып Асанов енді сенатор. Ал күні кеше Конституциялық өзгеріске байланысты мәжілістен кеткен «Қазақстан халқы ассамблеясының» өкілдері сенатқа жайғасты. Ассамблея атынан сенат мандаты Евгений Больгерт, Закиржан Кузиев, Нурия Ниязова,
Алишер Сатвалдиев, Геннадий Шиповскихларға бұйырды. Заң бойынша сенат депутаттардың бір бөлігін мәслихат депутаттары сайласа, бір бөлігін президент өз жарлығымен тағайындайды.
