Ақтөбедегі белгілі шенеунік Жанаргүл Дүйсекенова Қазақстанның Қаржы министрлігінің үстінен сотқа арыз берді деп хабарлады "Ақтөбе Таймс" газеті.
Дүйсекенова заңсыз қылмыстық қудалау үшін моральдық зиянды өтеу ретінде екі миллион теңге талап етіп отыр. "Азаматтық істі қарау аяқталуға жақын", - деп жазды басылым.
Ақтөбе әкімдігінің тұрғын үй бөлімінің бұрынғы басшысы Жанаргүл Дүйсекенова бір жылдан астам қылмыстық қудалауда болған. 2019 жылдың сәуірінде қызметтік жағдайын пайдаланып алаяқтық жасады деген күдікпен қамауға алынған болатын.
2015-2018 жылдар аралығында Дүйсекенова басқа адаммен алдын ала сөз байласып, сенімге кіріп, бөтеннің ақшасын ірі мөлшерде иеленіп, мемлекеттік бағдарлама бойынша баспана алып беремін деп уәде еткен. Қылмыстық іс бойынша жәбірленуші ретінде 38 адам анықталып, шығын көлемі шамамен 100 миллион теңге болған.
Шенеуніктің достары Қазақстан Президенті Қасым-Жомарт Тоқаевқа, сондай-ақ сол кездегі сенат төрағасы Дариға Назарбаеваға, бас прокурор Ғизат Нұрдәулетовке және Ақтөбе облысының әкімі Оңдасын Оразалинге ашық үндеу жазған.
Кейін сотта оның кінәлі емес екені анықталды, ақталып шықты. Тұрғын үй бөлу секторы бойынша қызметке оралған Дүйсекенова мәжбүрлі түрде бара алмаған уақыты үшін жалақысын өндіруге арыз берген. Алайда, әкімдіктегі жұмыс бөлімі және қазіргі лауазымы басқа. Соңғы бес айда Дүйсекенова Ақтөбе қаласының экономика және қаржы бөлімі басшысының орынбасары болып жұмыс істеп жатыр.
Қазір қаржы министрі Ерұлан Жамаубаев. Оған дейін бұл қызметті Бақыт Сұлтанов, кейін Әлихан Смайлов атқарған.
MalimBlocks
