«Ол шіркеуді де бомбалауға дайын!» – «Рождествошыл» Путиннің әрекетіне әлем не дейді?

Путин христиандардың діни мерекесі «Рождество» қарсаңында соғысты 36 сағатқа тоқтату туралы бұйрық берді. Және ол Украина тарапын да осыған үндейді.

«Әскери қақтығыстар аймағында православ сеніміндегі азаматтардың көптеп тұратынын ескере отырып, Украина тарапын атысты тоқтатуға шақырамын», - деген Путиннің сөзін оның баспасөз қызметі таратты.

Бірақ, Путиннің бұл әрекетін Украина тарапы қулық деп есептейді. Украина президенті Влодимир Зеленский Путиннің үндеуіне қатысты мәлемдемесінде:

«Қазір бұлар Рождествоны бүркемелеу мақсатында пайдаланбақ, Донбасстаға біздің сарбаздардың екпінін басып, техникасын, қару-жарағы мен мобилизацияланған азаматтарын біздің бекінісімізге жақын жерге орналастырғысы келеді. Бұдан не шығады? Тағы да сол қырғын көлемін өсіреді», - деді ол.

Ресей президентінің үндеуіне алғашқылардың бірі болып АҚШ президенті Джо Байден де пікір білдірді. Ол Путинге сенуге болмайтынын, оның аяқ асты дінді құрметтеп, құдайды есіне ала қалуы қулық деп есептейді.

«Мен Путинің айтқандарына қатысты жауап бергім келмейді. Бұл қызық нәрсе сияқты көрінеді маған. Ол ауруханаларды, балабақшаларды, шіркеулерді бомбалауға дайын екенін 25-інде де (желтоқсан), Жаңа жылда да көрсетті. Меніңше ол ес жиып алуды көздейді», - деді Байден.

Осыған ұқсас пікірді Ұлыбритания да, БҰҰ мен Еуроодақ та білдірді. Олар да 36 сағатқа соғысты тоқтатудың ешқандай адамгершіліктен тумағанын, жай ғана қулық екенін айтып жатыр.