Өңірлік кадр резервіне 505 адам қабылданды
Салалық бағыттар мен резервшілердің санын өңірлік кадр комиссиялары белгіледі
Қазақстанның өңірлік кадр резервтеріне барлығы 505 адам қабылданды. Бұл мамандар жергілікті атқарушы органдардың «Б» корпусының мемлекеттік әкімшілік лауазымдарына конкурссыз орналаса алады.
Облыстардың, республикалық маңызы бар қалалардың, Астананың өңірлік кадр резервтеріне іріктеу ақпан-тамыз айлары аралығында өткізілген болатын. Кадр резервін құру кезінде өңірлерді дамытудың ерекшелігі мен басымдықтары ескеріліп, 7 бағыт (индустрия және өнеркәсіп, экономика және қаржы, әлеуметтік сала, тұрғын ұй-коммуналдық шаруашылығы және инфрақұрылым, агроөнеркәсіп кешені және жер қатынастары, цифрландыру және экология) бойынша жүргізілді. Ал нақты салалық бағыттар мен резервшілердің санын өңірлік кадр комиссиялары белгіледі.
Мемлекеттік қызмет істері агенттігінің ақпараты бойынша, құжаттар 1-31 наурыз аралығында қабылданды. Жобаның ресми сайтында барлығы 11 505 адам тіркелген, оның ішінде 5 354 кандидат іріктеуге қатысуға жіберілді.
Заңнаманы білуге және жеке қасиеттерін бағалауға арналған тестілеу кезеңі өңірлерде орналасқан тестілеу орталықтарында офлайн форматта өткізілді. Бұл ретте, заңнаманы білуге арналған тестілеуге - 5 354 адам, жеке қасиеттерді бағалауға арналған тестілеуге – 2433 кандидат жіберілді.
Құзыреттілікті бағалау кезеңі Астана қаласында Қазақстан Республикасы Президентінің жанындағы Мемлекеттік басқару академиясының базасында офлайн форматта Ассессмент-орталық әдісімен өткізілді. Осы кезеңге барлығы 1031 кандидат жіберілді. Ассессмент-орталыққа 939 адам (94%) келіп, 62 адам (6%) келмеген.
«Өңірлік кадр комиссиясында құрылымдық сұхбат» кезеңіне 810 адам өтіп отыр. Сұхбат кандидат таңдаған салалық бағытқа сәйкес жобаны таныстыру форматында жүргізілді.
- 23-26 тамызда өңірлік кадр комиссияларының қорытынды отырыстарында өңірлік кадр резервтеріне қабылданатын кандидаттардың тізімдері айқындалды. Іріктеудің нәтижелері бойынша өңірлік резервтерге барлығы 505 адам қабылданды, - деп хабарлады агенттіктің баспасөз қызметі.
Өңірлік кадр резервтеріне қабылданған адамдардың тізімі жобаның onir.pkrezerv.gov.kz ресми сайтында жарияланды.
Фото: akwatoria.ru
