Бейсенбі күні Брюссельде қазақстандық делегацияның қатысуымен бірінші ядролық энергия саммиті өтті, деп хабарлайды ҚазАқпарат.
Бельгия үкіметі Халықаралық атом энергиясы жөніндегі агенттікпен (МАГАТЭ) бірлесіп ұйымдастырған Саммитке Қазақстанның Бельгиядағы Елшісі Марғұлан Баймұхан мен «Қазатомөнеркәсіп» ҰК» АҚ төрағасы Мейіржан Юсупов қатысты.
Шараға 22 мемлекет пен үкіметтің басшысы, Еуропалық кеңес, Еуропалық комиссияның президенттері, министрлер, сондай-ақ 300-ден астам халықаралық ұйым, трансұлттық компания, дипломатиялық миссия және сарапшылық топ басшылары қатысты.
Шараға Бельгияның премьер-министрі Александр де Кроо мен МАГАТЭ бас директоры Рафаэль Мариано Гросси төрағалық етті.
Саммиттің мақсаты – климат өзгеруінің жаһандық мәселелерін шешу, энергетикалық қауіпсіздікті арттыру және экономикалық дамуды ынталандырудағы атом энергетикасының рөлін талқылау.
Медианың хаюарлауынша, «Қазатомөнеркәсіп» ҰАК» АҚ президенті Мейіржан Юсупов «Энергия ресурстарын үздіксіз жеткізуді қамтамасыз ету» тақырыбындағы дөңгелек үстелге қатысты.
Қазақстан табиғи уран өндіруден әлемде көшбасшы (2022 ж. – 43%), уран қоры бойынша да екінші орында (2021 ж. – 13%). Сонымен қатар, Қазақстан Еуропа нарығына табиғи уранның негізгі жеткізушісі саналады (үлесі шамамен 27%).
Елші Марғұлан Баймұханның айтуынша, Саммит барысында атом өнеркәсібіндегі түрлі өзекті тақырып бойынша пікірталас болған.
- Саммитте дамушы елдер үшін ядролық технологияның қолжетімділігі туралы айтылды. Түрлі салаға арналған жобаларды қаржыландыру, соның ішінде атом өнеркәсібіндегі инновациялар, оларды тамақ өнеркәсібі, ауыл шаруашылығы және медицина салаларында қолдану мәселелері сөз болды. Осы саладағы мәселелер де талқыланды. Сонымен қатар, бүгінде атом өнеркәсібінде тіпті білікті кадрлар тапшылығы байқалады, бүкіл әлемде атом электр станцияларының немесе шағын модульдік реакторлардың ауқымын кеңейту қажеттілігі туындады. Сонымен қатар, көптеген ел, әсіресе Еуропа елдері «жасыл энергия» энергия бағасының тұрақтылығын сақтауға көмектеседі деп есептейді, - дейді ол «ҚазАқпарат» тілшісіне берген сұхбатында.
ФОТО: reddit.com
Байланысты жаналықтар
MalimBlocks
