Қазақстан Швейцариядағы бейбітшілік саммитіне қатыса ма
Бұл жиын Украина билігінің өтініші бойынша ұйымдастырылмақ.
Сыртқы істер министрлігінің ресми өкілі Айбек Смадияров Швейцариядағы бейбітшілік саммитіне Қазақстанның қатысуы мүмкіндігіне қатысты сұраққа жауап берді, деп хабарлайды ҚазАқпарат.
Бұл саммитке еліміздің қатысуы халықаралық іс-шаралар кестесіне сәйкес және осы мәселе бойынша Қазақстанның ресми ұстанымын ескере отырып қаралады. Өздеріңіз білетіндей, Қазақстан Украина және Ресеймен тарихи жағынан бірдей тығыз саяси, экономикалық, мәдени-гуманитарлық қарым-қатынасты қолдайды. Біз әрқашан барлық елдің тәуелсіздігі мен аумақтық тұтастығын сақтау және БҰҰ Жарғысы қағидаттарын орындау тұрғысынан сөйлейміз. Осы жағдайда біз халықаралық құқық пен БҰҰ Жарғысы қағидаттары негізінде бұл қақтығысты осы елдер арасындағы екіжақты қатынастар деңгейінде тек бейбіт жолмен шешуді дәйекті түрде қолдаймыз, - деді А. Смадияров министрліктегі апталық баспасөз мәслихатында.
Еске салсақ, биылғы 15-16 маусым аралығында Швейцарияда Украинадағы жағдайды реттеуге қатысты саммит өтеді. Бұл жиын Украина билігінің өтініші бойынша ұйымдастырылмақ.
Фото: интернеттен
MalimBlocks
