Сәтбаев қаласындағы жанжалға қатысты сотқа тартылған айыпталушылар прокурормен процессуалды келісімге келді.
Келісімге сәйкес, айыпталушылар тағылған айыппен, көрсетілген дәлелдермен және прокурор сұраған жазамен келісіп, үкімге шағым түсірмейді.
Былтыр Сатбаевта жергілікті тұрғындардың бірі кішкентай қызды зорлады деген хабар тарағаннан кейін, жүздеген адам күдіктінің үйіне барған. Оның арты полиция мен наразылар арасындағы жанжалға ұласып, салдарынан ондаған адам зардап шеккен.
Прокурор жаппай тәртіпсіздікті ұйымдастырды және бассыздыққа шақырды деп айыпталғандарға түрме жазасын сұраған. Атап айтқанда, тоғыз адамды үш жылға түрме жазасына кесуді, 44 айыпталушыға 4 жыл шартты жаза, 2 айыпталушыға бір жарым жыл шартты жаза сұрады.
Сатбаевтағы жанжалға байланысты 57 адамға айып тағылған. Екі адамға ідеу жарияланған. Олардың ісі бөлек тергеліп жатыр. Төрт адам "жаппай бассыздық ұйымдастырды" деп, екі адам "жаппай бассыздыққа шақырды" деп, 51 адам "төбелеске қатысты" деп айыпталған. 42 сотталушыға "билік өкіліне күш көрсетті" деген қосымша айып тағылған.
Сотқа тартылғандар арасында екі жасөспірім мен алты әйел бар. 45 айыпталушы бірнеше айдан бері тергеу изоляторында отыр. Сот үкімінің қашан шығатыны әзірге белгісіз.
2020 жылдың шілде айында Сәтбаевта «62 жастағы ер адам кішкентай қызды ұрлап әкетіп, зорлады» деген ақпарат тараған. Кейіннен қалада жаппай тәртіпсіздік болған. Күдікті тергеу изоляторында асылып қайтыс болған. Полиция «ол өз-өзіне қол жұмсады» деген қорытынды жасаған. Қазір ерлі-зайыпты екі адам «адам ұрлады», «зорлады», «жыныстық сипатта зорлық-зомбылық жасады» деген күдікпен қамауда отыр. Олардың соты жабық режимде өтуде.
MalimBlocks
