Меруерт Түсіпбаева: Марқұмның құпиясын ақтару - көргенсіздік

Танымал әнші Меруерт Түсіпбаева марқұм болған танымал тұлғалардың өміріне қатысты құпияны жарияға жар салу жақсылыққа апармайтынын айтты, деп хабарлайды Malim.kz.

«Пост жазуға, сұхбат беруге құлқым жоқ. Өтірік айтқым келмейді. Шындық көпшілікке ұнамайды. Тыныштық керек, дегенмен, көптен бері осы ой мазалап жүр еді… Осы дүниеден өтіп кеткен танымал адамдар туралы, сұхбат беру дұрыс емес. Марқұмдардың көрге өзімен алып кеткен құпия-сырларын ақтару – көргенсіздік. Жақында осы тақырыпта бір үзінді көріп қалып, жағамды ұстап едім. “Мұнысы несі екен?!” деп ойладым да қойдым. Тіпті мынау не деп оттап отыр деп те ұрысып алдым. Бәлкім, ол тірі кезінде сізге сеніп, жан-дүниесін ақтарған болар?! “Өзі жоқтың –көзі жоқ” деп, абыройын төгіп, марқұмның бар сырын дүйім жұртқа жария ету керек пе?!», - деп жазды өнер иесі.

Әнші өмірден өткен танымал тұлға туралы артық сөз айту оның ұрпағына кері әсер ететінін атап өтті.

«Құдай-ау, ол танымал адамның өзі мен көзі кеткенімен артында бала-шағасы, ел-жұрты, жекжаты, көрермені қалды емес пе?! Иә, ол марқұм қайтып келіп, өсекшіні сілкімес, жауапқа тартпас, сотқа бермес. Бірақ артында қалған ұрпағы бұдан кейін қалай өмір сүреді?! Елдің бетіне қалай қарайды?! Неге сонша қатыгез болдыңыздар, адамдар!», – деп жазды әнші.