Шәріп Серік өзін Бишімбаевтың қасына «отырғызғандарды» сотқа берді
Адвокат Жанна Уразбахова ЖИ арқылы жасалған видеоның ешқандай қылмыс емесін айтқан
Актер Шәріп Серік жасанды интеллект көмегімен өзін Қуандық Бишімбаевтың қасына отырғызып, видео жасаған азаматтардың үстінен арыз түсірді, деп хабарлайды Malim.kz.
Бұл туралы видеоны жасаған креаторлардың бірі — Арман хабарлады. Оның айтуынша, аталмыш видео 4,5 миллионнан астам қаралым жинаған. Арманның сөзінше, аудандық полиция басқармасынан оған қоңырау шалып, актер Шәріп Серіктің ресми түрде арыз бергенін хабарлаған.
Әзірге меннен ресми түсініктеме алынған жоқ. Тек түсініктеме беру үшін шақырту болды. Алайда, әзірге жауап алу сияқты процессуалдық әрекеттер жүргізілген жоқ. Қазір бұл материалдар тиісті органдарда қаралып жатыр, – деді Арман.
Оның айтуынша, істі жалғастыру немесе тоқтату туралы шешім әзірге қабылданбаған.
Шәріп Серік те, оның өкілдері де менімен тікелей байланысқа шыққан жоқ, – деп толықтырды ол.
Сонымен қатар Арман өзіне адвокат Жанна Уразбаховадан құқықтық кеңес алғанын айтты. Заңгердің түсіндіруінше, жасалған видеода қылмыс құрамы жоқ.
Менің видеомда жалған ақпарат, есімдер немесе жеке айыптаулар жоқ. Бұл тек зорлық-зомбылыққа қарсы жеке көзқарасымды шығармашылық тәсілмен жеткізу мақсатында жасалған. Осыны нақтылау үшін мен полицияға қайта хабарластым. Маған істі жалғастыру немесе тоқтату туралы түпкілікті шешімді тиісті органдар қабылдайтынын түсіндірді. Бұл туралы қосымша ақпарат берілетін болады, – деп түйіндеді Арман.
Фото: видеодан кадр
