12 бала уланып, бір бала қаза болды

«Қарағанды облысының балаларға арнаулы әлеуметтік қызмет көрсету орталығындағы 12 бала ауруханаға түскен. Оның 6 жансақтау бөлімінде жатыр. Өкінішке орай бір бала қаза болды. Бес баланың жағдайы орташа. Барлығы ер бала. Ауруханаға балалардың алды 30 шілде кешке түскен, олардың неден уланғаны белгісіз», – деді еліміздің бас санитар дәрігері Айжан Есмағамбетова.

Қарағанды облысы әкімдігінің хабарлауынша, оқиғаның себебін анықтау үшін арнайы комиссия құрылды. Қылмыстық іс қозғалды және Қарағанды облысының арнайы прокурорлар басқармасына берілді.

Бас прокуратураның баспасөз қызметі кеше балалардың тамақтан улану фактісі бойынша сотқа дейінгі тергеу басталғанын мәлімдеді.

Елімізде жетім балалар мен ата-анасының қамқорлығынсыз қалған балаларға, сондай-ақ мүмкіндігі шектеулі балаларға арнаулы медициналық-әлеуметтік қызмет көрсететін 84 мекеме бар. Оның 37-сі балаларға арнаулы медициналық-әлеуметтік қызмет көрсету орталығы болса, 47 балалар үйі, сондай-ақ 2959 баланы қамтитын отбасын қолдау орталықтары да жұмыс істейді.

Бас прокуратура уәкілетті мемлекеттік органдар мен аумақтық прокурорларға аталған мекемелерді кешенді тексеруді ұйымдастыруды тапсырды.

Балалардың ауыр жағдайда жатқанына байланысты денсаулық сақтау министрі Ажар Ғиният Қарағанды облысына жолға шықты.