Атырауда су тапшы, техника ескірген. Шәпкеновтің шарасыздығы

Экологиясы нашар Атырау облысында енді суға деген зәрулік артады. Елордаға облыс әкімі Шәпкенов жай келмей, жайсыз хабар ала келді.

Айтуынша, алдағы 5 жылда Атырау облысында су тұтыну көлемі 45 пайызға көбеймек.

Мәжілісте өтіп жатқан Парламенттік тыңдауда Шәпкенов:

«Атырау қаласы мен Мақат ауданын сумен қамтамасыз ететін тазартқыш жабдықтар өткен ғасырдың 30-60 жылдары қолданысқа берілген. Қазір олар апаттық жағдайда. Алдағы 5 жылда өңірдегі су тапшылығы 45 пайызға өседі деп болжанып отыр», - деді.

Әзірше  жаңа екі сүзгі стансасын іске қосу ойластырылған.  Бірақ бұл жұмыс әлі жоспар күйінде тұр.

 «Астрахан-Маңғышлақ су құбырының екі кезеңге жоспарланған жаңғырту жұмыстарын кейінге шегермей, тездетіп шешу қажет. Қолдауларыңызды сұраймыз», - деді облыс  басшысы. 2040 жылға қарай Қазақстанда су тұтыну 46 пайызға артады.