Л.Гумилев атындағы Еуразия ұлттық университетінде «Еуразиялық интеграция - Н.Назарбаевтың тарихи бастамасы» тақырыбында онлайн режимде телекөпір өтті.
«Еуразиялық интеграция - Н.Назарбаевтың тарихи бастамасы» тақырыбында телекөпір өтті Шара аясында БАҚ өкілдеріне сұхбат берген аталған университеттің профессоры, тарих ғылымдарының докторы Мақсат Алпысбес 2015 жылы еуразиялық интеграциялық процестің нақты нәтижесі - Еуразиялық экономикалық одақтың құрылуы болғандығын айтады. «Барлық процестер тектоникалық өзгерістерді көрсетеді. 70 жылға жуық уақытқа созылған Совет одағының тарихы 1991 жылы аяқталғаны белгілі. Сол кезде СССР құрамында болған одақтас республикалардың арасындағы экономикалық, мәдени байланыстардың тиімді жақтарын сақтап қалу маңызды еді. Осыған байланысты 1994 жылы Қазақстанның Тұңғыш Президенті Нұрсұлтан Назарбаев экономикалық тұрғыдағы еуразиялық интеграция идеясын бастамашы болды. Бұл әрине, бұрынғы СССР кеңістігінде жаңадан құрылған ТМД елдері аясындағы қарым-қатынастардың барлығын бейбіт түрде бірқалыпты дамуына бағытталған идея еді. Сол идеяның аясында Л.Гумилев атындағы Еуразия ұлттық университеті құрылды», - деді ол. Ғалымның атап өтуінше, интеграциялық процестердің маңызды мәселелерінің бірі - бұл ғылыми, мәдени, әлеуметтік, экономикалық байланыстарды тиімді бағытта дамыту. Сондықтан шығармашылық зиялылардың, қоғам қайраткерлерінің ынтымақтастығы да маңызды. «Бүгінгі таңда экономикалық интеграция әр тарапқа тиімді болуы тиіс. Бұл тұрғыда экономикалық байланыстар екі жаққа да тепе-тең деңгейін сақтауы қажет. Еуразиялық интеграцияға қатысты екі түрлі көзқарас бар. Біреуі еуразиялық интеграциялық процестерді тереңдету ұстанымын жақтайды. Ал екінші тараптың пікірінше: «Еуразиялық экономикалық интеграция өзінің даму деңгейіне жетіп, нәтижесін беріп отыр. Енді мұнан кейін мемлекетүстілік құрылымдар Қазақстан үшін жауап бере алмайды». Біздің ойымызша, расында еуразиялық экономикалық интеграциялық процестер өзінің толық деңгейіне жетті. Ендігі мәселе осы экономикалық одақ аясындағы 5 мемлекет, яғни, Қазақстан, Қырғызстан, Ресей, Армения және Беларусь бір-бірінің ұлттық тәуелсіздігін құрметтеп, тепе-тең қарым-қатынас жасауы тиіс», - деді Мақсат Алпысбес.
MalimBlocks
