Қант нарығындағы заңсыздық бойынша  тергеу басталды  

Сұлтановтан «мұраға» қалған қант проблемасы Жұманғариннің бас ауруына айналған сыңайлы. Қант нарығында тапшылық неден болғанын анықтау үшін тергеу жүріп жатыр.  Сауда және интеграция министрі Жұманғарин бұл мәселе жөнінде түсініктеме берді. 

Оның айтуынша,  қант  өндірісінде заң бұзу фактілері байқалып отыр. Монополияға қарсы орган тергеу ісін  бастаған. «Қант бойынша айналым схемасына айтарлықтай көп қаражат бөлдік. Көктемгі дала жұмыстарына 140 млрд теңге бөлінген болатын. Айналым схемасына 100 млрд теңгеге жуық қаражат бөлінді. Неге бұл қаражат қант зауыттарына жетпеген? Анық-қанығын айқындау керек», - деді ол. 

Сондай-ақ, қант нарығында монополия орнатуға әрекет еткен компания аталды.  

«Тергеу жұмыстарының  қорытындысы шығуы керек. Шикі қантты сатып алуға, өндіруге ақша берілген. Енді ақша берген адам 90 пайыз қантты "сатамын" деп өзіне алып алған. Ол деген – бизнес, әрине. Не болғанын түсінуіміз керек. Проблема неден шықты? Неге айналым сехмасына берілген 100 млрд теңге әкімшіліктен бірден зауыттарға бармады? Қорытындысын монополияға қарсы орган айтуы керек. Ол «КаИс Инвест» деген компания», - деді Жұманғарин.