Қаржы пирамидасына БҚО тұрғындары 769 млн теңгеге алданған
Батыс Қазақстан облысында «Chia Tai Pharmaceutical» компаниясының өкілдері тұрғындардың 769 млн теңге қаржысын жымқырған. Күдікті ұсталып, сот санкциясымен екі айға қамауға алынған.
Бұл туралы Қаржы мониторинг агенттігінің ресми өкілі Әлібек Әбділов айтты. Оның сөзінше, қаржы пирамидасын басқару фактісі бойынша «Chia Tai Pharmaceutical» компаниясының өкілдеріне қатысты сотқа дейінгі тергеуді Қаржы мониторинг агенттігі БҚО бойынша департаменті жүргізуде.
– Бұл компания өзін инвестициялық ұйым ретінде көрсетіп, жоғары және тұрақты табыс әкелуге уәде берген. Сонымен бірге, «Chia Tai Pharmaceutical» жеке тұлғалардан ақшаны алып, кәсіпкерлік қызметке пайдаланбай, қатысушылар арасында қайта бөлген. Келтірілген шығын көлемі бүгінде 769 млн теңгеден асады,- дейді Әлібек Әбділов.
Ол қазіргі уақытта қаржы пирамидасын ұйымдастырды деген күдікті ұсталып, сот санкциясымен екі ай мерзімге қамауға алынғанын айтты.
«ҚР ҚПК 201-бабына сәйкес өзге ақпарат жария етуге жатпайды»,- деді Қаржы мониторинг агенттігінің ресми өкілі Әлібек Әбділов.
Байланысты жаналықтар
MalimBlocks
