Шет елдегі қазақтар енді азаматтық алмай-ақ бизнес жүргізеді
Үкімет шет елдегі этникалық қазақтардың Қазақстанда жұмыс істеуін жеңілдетпек. Ол үшін «Ата жолы» картасы ашылған. Оны «Құтты мекен» мобильді қосымшасында рәсімдеуге болады.
«Ата жолы» картасы – этникалық қазақтарға елімізде бизнес-кейстерін іске асыруға және елде тапшы мамандардың қызмет етуіне берілетін құжат. Карта иелеріне өзге елдегі азаматтықтарын сақтай отырып, республика аумағында 10 жылғы дейін тұрақты тұруға рұқсат беріледі. Бұл құжатты «Құтты мекен» мобильді қосымшасында өтініш беру немесе Қазақстан елшілігіне жүгіну арқылы алуға болады, - деп хабарлады Еңбек және халықты әлеуметтік қорғау министрлігі.
Құжатты алу үшін «Құтты мекен» мобильді қосымшасына тіркелгеннен кейін өтінім бес жұмыс күні ішінде қаралады, содан кейін әлеуметтік қорғау және халықты жұмыспен қамту саласындағы жергілікті атқарушы орган сол қосымша арқылы алушыны құжаттың ұсынылғаны туралы хабардар етеді. Осыдан кейін этникалық қазақ виза алу үшін СІМ-нің шетелдегі мекемесіне жүгіне алады немесе өзі тұратын елмен Қазақстан арасында визасыз режим болса, бірден елге келе алады.
Келгеннен кейін «Ата жолы» картасының иегері ұзарту мүмкіндігімен 10 жыл мерзімге тұруға ықтиярхатты рәсімдеу үшін аумақтық ішкі істер органдарына жүгінуге тиіс. Карта алынған санатқа байланысты этникалық қазақ не жұмыс берушімен шартқа қол қояды және оны «еңбек шарттарын есепке алудың бірыңғай жүйесінде» тіркейді, не өзінің бизнес-жоспарын жүзеге асыруға кіріседі.
Ережеге сәйкес «Ата жолы» картасы үш санаттың біріне сәйкес келетін шетелде тұратын этникалық қазақтар үшін ұсынылады:
– ҚР азаматтығына қабылдаудың оңайлатылған тәртібі белгіленетін адамдар үшін кәсіптердің болуы;
– үміткердің Қазақстанда талап етілетін кәсіптерге ие болуы;
– тұрақты тұратын немесе азаматтығы бар елде тіркелген жұмыс істеп тұрған бизнестің болуы.
Бұл карта елге кәсіпқой мамандарды және табысты кәсіпкерлерді тарту үшін 2023-2027 жылдарға арналған көші-қон саясатының тұжырымдамасына сәйкес әзірленді. «Ата жолы» картасының иегерлерінің этникалық қазақтардан басты айырмашылығы – олар басқа елдің азаматы болып қала отырып, азаматтар мен қандастар сияқты құқықтарға ие болады. Мәселен, оларға қазақстандық заңнамаға сәйкес жұмысқа орналасу немесе кәсіпкерлік қызметті жүзеге асыру құқығы, медициналық көмектің кепілдік берілген көлемі шеңберінде әлеуметтік төлемдер жүргізу және қызмет алу, тегін орта білім алу, мемлекеттік мекемелерде тегін арнаулы орта немесе жоғары білім алу конкурсына қатысу немесе жеке оқу орындарында ақылы оқу және т. б. мүмкіндігі қолжетімді болады. Бұдан басқа, «Ата жолы» картасының иегерлері еліміздің азаматтығын оңайлатылған тәртіппен алуға мүмкіндігі бар.
Дегенмен, «Ата жолы» картасы бар адамдардың мемлекеттік органдары мен жергілікті өзін-өзі басқару органдарына сайлауға және сайлануға құқығы жоқ, республикалық референдумға қатыса алмайды және мемлекеттік қызметте жұмыс істей алмайды.
