«Астана Арена» стадионы реконструкциядан өтіп, бүгінде халықаралық матчтарды өткізуге дайын тұр, деп хабарлайды Malim.kz.
Астана қаласы мәслихатының төрағасы Ерлан Каналимовтың сөзінше, спорт ғимаратында UEFA талаптары мен ұсыныстарын ескере отырып, барлық құрылыс-монтаж жұмысы аяқталды. Атап айтқанда, ескі жабындылар, алаңды жылыту және суару жүйелері толығымен ауыстырылып, сондай-ақ, жасанды газон жаңартылған.
Былтыр желтоқсанда футбол алаңы UEFA стандарттарына сәйкес сертификаттаудан өтіп, халықаралық сертификатқа ие болған еді.
Сонымен қатар, елорда мәслихатының қолдауымен бастапқыда мемлекеттік-жекеменшік әріптестік (МЖӘ) механизмі арқылы жүзеге асырылған «Қазақстан» спорт сарайын қайта жаңғырту жұмыстары да басталған.
Қазір тиісті құжаттарды рәсімдеу бойынша жұмыстар жүріп жатыр. Құрылыс-монтаж жұмыстарын биыл бастау жоспарланып отыр. Жобаны аяқтау және нысанды пайдалануға беру 2026 жылға жоспарланған. Бұл жоба су спорты түрлерін, мәнерлеп сырғанауды дамытуға және елорда тұрғындарының белсенді демалысы үшін қолайлы жағдай жасауға бағытталған, деп жазды мәслихат төрағасы.
Фото: facebook/Ерлан Каналимов
