АҚШ президенті Дональд Трамп «барлық елге» 10 пайыз мөлшерінде қосымша баж салығын енгізу туралы жарлыққа қол қойды. Бұл туралы ол өзінің Truth Social әлеуметтік желісінде жазды, деп хабарлайды Malim.kz.
«Барлық елге арналған 10 пайыздық жаһандық баж салығына жаңа ғана қол қойғанымды хабарлау – мен үшін үлкен мәртебе. Ол іс жүзінде бірден күшіне енеді», – делінген жарияланымда.
Трамп қосымша баж салығын енгізу ниеті туралы бұған дейін де мәлімдеген еді. Бұл шешім АҚШ Жоғарғы соты 2025 жылдың сәуірінде енгізілген жаһандық баж салығын заңсыз деп танығаннан кейін қабылданды.
Ақ үйдің нақтылауынша, Трамптың қосымша 10 пайыздық баж салығы 24 ақпаннан бастап күшіне енеді және 150 күн бойы қолданылады.
Құжатқа сәйкес, аталған прокламация 150 күн мерзімге Америка Құрама Штаттарына импортталатын тауарларға 10 пайыздық қосымша импорттық баж салығын енгізеді. Уақытша импорттық баж салығы 24 ақпанда шығыс стандарт уақыты бойынша сағат 00:01-де күшіне енеді.
