113 қазақстандыққа "Болашақ" стипендиясы берілді

"Болашақ" халықаралық стипендиясы иегерлерінің алғашқы легі анықталды. 113 қазақстандық "Болашақ" халықаралық стипендиясының иегері атанды. Бұл туралы шешімді мемлекеттік хатшы Қырымбек Көшербаевтың төрағалығымен шетелде кадрлар даярлау жөніндегі республикалық комиссия шығарды.

"Болашақ" стипендиясының иегерлері әлемнің жетекші жоғары оқу орындарында магистратура не докторантура бағыты бойынша оқиды немесе ғылыми тағылымдамадан өтеді.

"Халықаралық бағдарламалар орталығы" АҚ-ның президенті Айнұр Кәрібозова биыл "Болашақ" бағдарламасы бойынша стипендия үш кезеңде тағайындалатынын айтқан. Келесі кезең қорытындылары тамыз аяғы не қыркүйек басы және қараша айларында жарияланады.

Үміткерлер "Болашақ" бағдарламасына медицина, жаратылыстану, әлеуметтік ғылымдар, білім беру, инновациялар мен жаңа технологиялар, креативті индустрия мен индустриалды инженерия бағыттары бойынша құжат тапсыра алады. Пандемияға байланысты биыл басым мамандықтар тізбесіне де бірқатар өзгеріс енгізілді.  Атап айтқанда, үміткерлер вирусология,  вакционология, иммунология, реабилитология,  биотехнология, креативті экономика мен роботехника салаларының біріне құжат тапсырып, конкурстық іріктеуден сәтті өткен жағдайда әлемнің жетекші оқу орындарының бірінде оқи алады. "Болашақ" бойынша оқуға ұсынылатын жоғары оқу орындарының тізімі мен басым мамандықтар тізбесі bolashak.gov.kz сайтының "үміткерлерге" бөлімінде жарияланған.

"Болашаққа" құжаттарды қабылдау 28 қазанға дейін жүреді. Ал конкурстық іріктеу 30 қарашаға дейін жалғасады.

 2021 жылы «Болашақ» бағдарламасы бойынша оқуға барлығы 1055 стипендия бөлінді, оның ішінде 555 стипендия магистратура, резидентура, докторантура бағдарламалары бойынша берілді.

Сонымен қатар биыл президент Қасым-Жомарт Тоқаевтың тапсырмасы бойынша алғаш рет «Ғалымдар» тағылымдамасының жаңа санаты бойынша 500 стипендия бөлінеді. Осының арқасында еліміздің ғалымдары әлемнің жетекші зерттеу орталықтарында тағылымдамадан өтіп, тәжірибесін шыңдай алады.

Фото: 24.kz