Оңтүстік Кореядағы жылдамдықты автомагистральде төрт қазақстандық қаза тапты, деп хабарлайды Malim.kz Korea JoongAng Daily басылымына сілтеме жасап.
«Қазақстанның төрт азаматы отырған көлік Сохэан тас жолындағы жардан құлап, салдарынан оның ішіндегі барлық адам бейсенбі таңертең ерте қайтыс болды», – делінген хабарламада.
Мәліметке сәйкес, Mercedes-Benz маркалы көлік Хвасон қаласында (Кёнгидо провинциясы) сағат 12:30 шамасында жолдың оң жақ қоршауына соғылған. Кейін көлік бірнеше метрге ұшып, соқтығысқаннан кейін өртеніп кеткен.
Оқиға орнына өрт сөндірушілер дереу жіберіліп, өртті 30 минут ішінде сөндірген. Қиранды арасынан төрт ер адамның денесі табылған.
«Сағат 13:00-дегі жағдай бойынша қаза тапқандардың тұлғасы анықталған жоқ. Полиция жол апатының нақты мән-жайын тергеуде», – делінген хабарламада.
Фото: Korea JoongAng Daily
