Өскеменде қыздар қатарласына буллинг жасаған
Мектеп жасындағы қыздар құрбысын бейәдеп сөздермен қорлап, тізерлетіп кешірім сұратқан
ШҚО-да қыздар арасында болған жанжалдың бейнежазбасы әлеуметтік желіде таралып жатыр. Оқиға Зайсан ауданында болған.
Мектеп жасындағы қыздар құрбысын бейәдеп сөздермен қорлап, тізерлетіп кешірім сұратқан. Сондай-ақ бейнежазбадан жасөспірімдердің шылым шегіп отырғанын көруге болады.
ШҚО Білім басқармасының хабарлауынша, қазір тергеу жүргізіліп жатыр.
- Бұл оқиға бойынша жұмыстар басталды. Тергеу жүріп жатыр, - деді басқарма басшысы Иннеса Чернышёва.
Полиция департаменті бұл оқиға бойынша қылмыстық іс қозғалғанын мәлімдеді.
- Аталған факті бойынша қылмыстық іс қозғалды. Бұзақылық жасаған жасөспірім қыздар мектепішілік есепке қойылып, әкімдік жанындағы кәмелетке толмағандардың құқықтарын қорғау жөніндегі комиссияға тиісті ұсыныс енгізілді. Қазіргі таңда полиция қызметкерлері кәмелетке толмағандардың ата-аналарын балаларды тәрбиелеу жөніндегі міндеттерін орындамағаны үшін жауапкершілікке тарту бойынша жұмыс жүргізуде. ҚР ҚПК 201-бабына сәйкес өзге ақпарат тергеу мүддесіне орай жария етілмейді, - деп хабарлады баспасөз қызметі.
ШҚО-да былтыр қыздар төбелесі қоғамда үлкен резонан тудырып, екі жасөспірім сотталып кеткен болатын.
Фото: secretmag.ru
