Құлаған ұшақтың аман қалған жолаушысы оқиғаның қалай болғанын баяндап берді

Ақтау маңында болған ұшақ апатынан кейін, Баку мен Грозный арасында рейс жасаған Azerbaijan Airlines (AZAL) ұшағының жолаушысы Субхонкул Рахимов апатқа дейін болған жағдайлар мен экипаждың әрекеттері туралы айтып берді. Бұл туралы Анадолу жазды, деп хабарлайды Malim.kz.

Бұрынғы Тәжікстан азаматы, кейін Ресейде 24 жыл тұрып, сол жақтың азаматтығын алған Рахимов ұшақтың құлар алдында қатты дыбысын естігенін айтты. Ол ұшақтың Грозный қаласына жақын жерде болғанын нақты айта алмаған, өйткені тұман салдарынан жер көрінбеген. Дегенмен ұшақтың екінші рет қонуға дайындалып жатқанын сезген. Оны ұшақ капитанының маневрлерінен білген.

Сол дыбысы шыққан соң, оттегі маскалары түсе бастады. Ұшақ та зақымданып, қатты дірілдеп, кейін биіктікке көтерілді, бірақ ұшақтың басқарылуы нашарлады. Әуеде қолайсыз қалықтап, кейін төменгі биіктікке түсіп, ақырында теңіз көрінді, дейді ол.

«Жарылыс дыбысы ұшақтың сыртында болды ма және бұл жарылыс па?» деген сұраққа Рахимов растап жауап берген.

Оның айтуынша, сол дыбыстан кейін ұшақ басқарылуы қиындаған.

Ұшақ құлаған соң, Рахимов есін жоғалтпағанын, басын соғып, көз алдында оттың көрінгенін айтты. Бірақ көп ұзамай тыныштық орнап, ол аман қалғанына таңғалған. Бортсерік әйелдің сабырлы мінезі, адамдарды тыныштандыруы және әріптестерімен бірге жұмыс істегені ерекше таңқалдырған.

Ол медициналық көмек көрсету үшін Қазақстанға алғысын білдірген.

Айта кетейік, қайғылы оқиға 25 желтоқсан күні Ақтау маңында болған еді. 

Кейін Euronews Ақтау маңында апатқа ұшыраған ұшақ ресейлік зымыраннан атылғанын мәлімдеді.

Фото: aa.com.tr