Талғардағы төбелесте қаза болған Шерзаттың әкесі үндеу жасады

Талғар қаласында 16 жастағы Шерзат Болатты бір топ жігіт өлтіріп кеткен еді. Кеше ғана бауыр еті баласын жерлеген ата-анасы бүгінде істің әділ жүргізілуін талап етіп, Бас прокурордан көмек сұрауға мәжбүр болды.

Баланың туыстары істің бұрмаланып, дұрыс жүргізілмей жатқанын, күдіктілердің толық қамауға алынбағанын айтты.

Шерзаттың әкесі Бас прокурор Берік Асыловқа үндеу жасап, соттың ашық өтуін сұрады:

- Мен Бас прокурор Берік Ноғайұлына тікелей үндеу айтқым келеді. Талғардағы төбелесте қаза тапқан Шерзат Болаттың әкесімін. Талғар әкімдігі, прокуратурасы мен ішкі істер департаментінің басшысы ешқандай әрекет жасамай отыр. Қылмысты бұрмалап отыр. Менің марқұм болған баламның аты-жөнін де білмейді. Қал-жағдайымызды сұрауға да шамалары жетпей тұр. Түнде бізді тергеуге шақырып, өзімізді қорқытып, арыз жаздыртып отыр. Сізден сұрайтыным: ашық сот болуын талап етемін. Өлетін балам өлді, мені де алсын, мені де қамасын, бірақ әділ шешім үшін ашық сот болсын, - дейді Шерзаттың әкесі.

Айта кетсек, бұл қайғылы оқиға 2024 жылдың 4 қазанда Алматы облысының  Талғар қаласында болды. Марқұм Шерзаттың отбасы жалдап отырған дүкенге бір жігіт келіп, сыра алады, бірақ ақшасын төлемей, сол жерде жанжалдасып қалады. Дүкенде Шерзаттың әкесі мен оның бауыры  да болған. Әлгі жігіт бір топ досын шақырып, төбелес шығарады. Суық қарумен келген бұзақылар өрімдей жас баланы ата-анасының көзінше ұрып-соғып, өлтіріп кетті. Шерзаттың ағасын да жарақаттаған.

Алматы облысы ПД бастығының орынбасары Мәлік Қабдуалиев қылмыс жасағандар қамауға алынды деп хабарлаған еді.

Кеше Шерзаттың туыстары наразылыққа шығып, көшелерді жапты. Олар барлық күдіктілердің қамауға алынғанын талап етті. Айтуларынша, төбелеске қатысқан 13 адамның жетеуі ғана ұсталған, ал солардың араларында жүрген екі қыз іске куәгер ретінде тартылмақ.

Фото: видеодан скрин