Германияда өлтірілген қазақстандық экс-судья Айгүл Сайлыбаеваның күйеуі Мәскеуде көзге түсті, деп хабарлайды Malim.kz. Tengrinews.kz-ке сілтеп.
Telegram-дағы 112 арнасының журналистері Александр Донцовты Мәскеуден тауып, оны видеоға түсіріп алған. Бейнежазбада ер адам қылмысқа еш қатысы жоқ екенін мәлімдейді.
«Сіздер бәрін бұрыннан көрсетіп келесіздер. Өте көп өтірік айттыңыздар. Өте көп жалған ақпарат тараттыңыздар. Адамдар, арандатуға ермеңіздер, сенбеңіздер, бұл бандиттік әдістерге бой алдырмаңыздар», – дейді ол бейнежазбада.
Арнаның мәліметінше, 2 ақпанда Александр мен Наталья Донцовтар Мәскеу қаласының Тергеу комитетінде жауап берген. Алайда Наталья Ресей Конституциясының 51-бабын пайдаланып, тергеушімен сөйлесуден бас тартқан, делінген жазбада.
Интернетте көпшіліктің назарын аударған тағы бір жас жігіттің видеосы пайда болды. Ол өзін Жоғары экономика мектебінің студентімін деп таныстырды. Видео авторының айтуынша, Александр Донцов осы оқу орнында жұмыс істейді.
«Бүгін мен өз факультетімде күдікті маньяк бар екенін білдім. Бұл адам бес айдан бері НИУ ЖЭМ-де жұмыс істейді. Және ол менің сабақтарым жиі өтетін дәл сол ғимаратта жұмыс істейді», – дейді студент видеода.
Біз НИУ ЖЭМ-нің ресми сайтын тексердік. Порталдағы ақпаратқа сәйкес, Александр Донцов университетте бес айдан бері тіркелген, ал оның анкетаcы «Оқытушылар» бөлімінде бар. Сайттағы мәлімет бойынша, ол әлемдік экономика және әлемдік саясат факультетінің, әлемдік экономика департаментінің ғылыми қызметкері болып жұмыс істейді.
2024 жылдың маусым айында Германияда Қазақстан азаматы Айгүл Сайлыбаеваның жоғалғаны белгілі болды. Сыртқы істер министрлігінің мәліметінше, 5 маусымда Франкфурт-на-Майндегі Қазақстанның бас консулдығына Қазақстан азаматтары жүгініп, қыздарының екі күн бұрын жоғалып кеткенін хабарлаған.
Кейінірек жоғалған әйелдің мәйіті Бенсхайм қаласының маңынан табылғаны белгілі болды. Немістің Bild басылымы мәйіттің пластик қаптың ішінде болғанын, ал әйелдің өлер алдында зорлық-зомбылық көргенін хабарлады.
Германияның құқық қорғау органдары адам өлтіру фактісі бойынша қылмыстық іс қозғады. Германия Сыртқы істер министрлігінің мәліметінше, Дармштадт қаласының сотының шешімімен Сайлыбаеваның енесі — Наталья Донцова күдікті деп танылған. Германияда және Еуропаның басқа да елдерінде оны қамауға алу туралы ордер берілген.
2025 жылғы 13 қарашада Қазақстанның Ішкі істер министрлігі бұрынғы судья Айгүл Сайлыбаеваны азаптау фактісі бойынша тергеу бастағаны белгілі болды. Қазақстанда марқұмның күйеуі мен енесіне іздеу жарияланды.
