Қазақстанда су тасқыны басталғалы 113 мың адам эвакуацияланды
9,7 млн астам текше метр еріген қар суы сорып шығарылды, 2,4 млн қапшық және 1,2 млн астам тонна инертті материал төселді.
ТЖМ Азаматтық қорғаныс және әскери бөлімдер комитетінің аға офицері Ерасыл Сайпаш елдегі су тасқыны бойынша жаңа деректерді баяндады, деп хабарлайды Malim.kz.
Су тасқыны басталғалы бері барлығы 113 867 адам, оның ішінде 39 943 бала құтқарылып, эвакуацияланды, 112 539 мал қауіпсіз жерге айдалды. Осы сағатта 15 125 адам өз үйлеріне оралды. 6 704 адам, оның ішінде 3 052 бала эвакуациялау пункттерінде жатыр.
Ақтөбе, Қостанай, Ақмола, Атырау, Солтүстік Қазақстан облыстарында 5 732 жеке тұрғын үй, 1 579 аула аумағы және 2 035 саяжай үйлері су астында қалуда. 3 570 тұрғын үй мен 2 225 аула аумағынан судың бағыты бұрылды, - деді ол Республикалық ақпараттық штабта өткен брифингіде.
Су тасқыны салдарын жою,су тасқынына қарсы іс-шаралар мен авариялық-құтқару жұмыстары жалғасуда. 9,7 млн астам текше метр еріген қар суы сорып шығарылды, 2,4 млн қапшық және 1,2 млн астам тонна инертті материал төселді.
Авариялық-құтқару және су тасқынына қарсы жұмыстарға 33 391 адам, 4 470 техника, 890 су сору құралы, 392 жүзу құралы, 18 әуе кемесі жұмылдырылған. ТЖМ психологтары жергілікті жерлерде және жедел желі телефондары арқылы азаматтарға шұғыл психологиялық көмек көрсетуді жалғастыруда. Жедел желіге түскен 1 816 қоңырау пысықталды.
Фото: ТЖМ
MalimBlocks
