Экс-президент Нұрсұлтан Назарбаевтың жиен немересі Айсұлтан Назарбаевтың неден қайтыс болғаны айтылды.
Наурыздың 24-і күні Ұлыбританияның құпия өлімді зерттейтін ресми өкілі Айсұлтан Назарбаевтың қазасына байланысты сараптама қорытындысын жариялады. Зерттеуде Айсұлтан Назарбаевтың өліміне есірткіге тәуелділік себеп болғаны айтылған.
«Айсұлтан табиғи себеппен қайтыс болды деп есептеймін. Ол есірткіге тәуелділіктің салдарынан көз жұмған», - деді аға зерттеуші (коронер) Фиона Уилкокс.
Айсұлтан Назарбаев өмірінің соңғы жылдары Қазақстан билігі мен Назарбаевтар әулетін сынап, жемқорлық үшін айыптаған. Facebook желісіне түрлі посттар жазып, БАҚ өкілдеріне «өзіне анасы Дариға Назарбаевадан қауіп төніп тұрғанын» айтқан. Бұл оның қазасына байланысты түрлі жорамалдардың туындауына себеп болған.
Айсұлтан Назарбаев 2020 жылдың 16 наурызында Лондон қаласындағы саябақтардың бірінен ес-түссіз күйінде табылған. Кейіннен оның қайтыс болғаны хабарланған.
