Қазақстандық кеме: Түркия Украинаның өтінішін орындамады
Ресей жалға алған қазақстандық аты шулы "Жібек жолы" босатылды.
Түркия Қазақстанға тиесілі «Жібек жолы» кемесін босатты. Бұл кеме Украинаның Ресей басып алған Бердянскіден заңсыз жүк тиеп алып кеткен деген күдікке ілінген. Украина тарапы Түркиядан бұл кеменің Украинадан ұрланған астықты тасып бара жатқанын, оны тоқтатуды сұраған.
Көп ұзамай бұл кеменің Түркияға тиесілі Қарасу портында ұсталғанын, қаңтарылып тұрғаны хабарланған. Украинаның сыртқы істер министрлігі Түркияның бұл әрекетіне алғыс айтып, Украина-Түркия әріптестігінің жолға қойылғанын да айтқан. Түркия тарапы кеменің болашағы туралы нақты ештеңе айтпаған.
Бүгін Украина Түркияның кемені босатып жіберуіне байланысты:
«Украинадан ұрланған астық тиелген ресейлік «Жібек жолы» кемесінің түрік билігіне берілген қылмыстық іс туралы дәлелдерге қарамастан Қарасу портынан шығуына рұқсат берілгеніне өкініш білдіреміз. Киевтегі Түркия елшісі Украинаның сыртқы істер министрлігіне бұл өрескел жағдайды түсіндіру үшін шақырылады», - деп хабарлады Украина СІМ спикері Олег Николенко.
«Жібек жолы» туралы дау пайда болғанда қазақстандық ҚТЖ компаниясы бұл кемеге байланысты мәлімдеме жасап, оның тиеп келе жатқан жүгінің заңды болатынына сенетіндерін айтқан. Артынша ресейлік Green Line ЖШҚ компаниясына (кемені жалға алушы) ҚТЖ «барлық растаушы құжаттарды (келісімшарттар, куәліктер және т.б.) қоса бере отырып, мән-жайды жедел түрде егжей-тегжейлі түсіндіруді сұрап хат жолдағанын» да хабарлаған.
