Президент Қасым-Жомарт Тоқаевтың қатысуымен еліміздегі коронавирус індетіне байланысты эпидемиологиялық ахуал бойынша кеңес өтіп жатыр. Қасым-Жомарт Тоқаев елімізде вакцинация қарқыны жақсы болғанына қарамастан, вакинация көрсеткіші барлық аймақта жақсы емес екенін меңзеді.
"Біздің ең өзекті мақсатымыз – вирустың таралуын тоқтату емес. Әлемдік тәжірибе мұның мүмкін емес екенін көрсетіп отыр. Ең бастысы – аса ауыр науқастардың көбеюін болдырмау, адам өмірін сақтау. Сондықтан, оның бір ғана жолы бар. Бұл – жаппай вакцинация, екпе салу. Бүгінде 2,8 миллион адам толық вакцина салдырды. Бірақ жақсы қарқынға қарамастан, аймақтардағы ахуал жайлы бұлай біржақты кесіп айтуға болмайды. Пандемия аймақ басшылары үшін сынаққа айналды. Бұл емтиханнан әкімдердің кемінде жартысы "үшпен" сүйретіліп шықты, - деді Қ.Тоқаев.
Алайда Қасым-Жомарт Тоқаев жиында "үшпен сүйретіліп шыққан" қандай аймақтардың әкімдері екенін ашып айтпады.
Тоқаев вакцинация қарқыны төмен аймақтарға әдістемелік көмек көрсететін арнайы бригадалар жіберу керектігін айтты. Тоқаевтың айтуынша, әр аймақтың ерекшелігін алдын ала зерттеп бару керек.
Сондай-ақ Тоқаев вакцинаны тасымалдау мен сақтау мәселесін жете ойластыру керектігін айтты. Президенттің айтуынша, бұл жұмыс барлық аймақта бірдей тиісті дәрежеде жолға қойылған деуге болмайды.
19 шілдедегі дерек бойынша, елімізде вакцинаның екі компонентін 2,7 миллион адам салдырды. Вакцинация қарқыны бойынша, Маңғыстау, Атырау мен Батыс Қазақстан облысы артта келеді.
