Ресей Сыртқы істер министрлігінің ресми өкілі Мария Захарова Мәскеудің ТМД елдеріне қатысты саясатын түсіндіре отырып, ресми тұлғалардың мәлімдемелеріне ғана сүйенуге, «істі сөзбен емес, нақты әрекетпен бағалауға» және «фейктерге ермеуге» шақырды, деп хабарлайды Malim.kz.
Журналист Владимир Соловьевтің бір бағдарламасында айтылған сөздеріне қалай қарау керектігі жөніндегі сұраққа жауап берген ол:
«Ресми ұстанымды осыған уәкілетті ресми тұлғалар білдіреді», – деп атап өтті дипломат брифинг барысында.
Захарованың айтуынша, Мәскеудің Орталық Азия мемлекеттерімен қарым-қатынасқа қатысты ұстанымы ең жоғары деңгейде бірнеше мәрте айтылған және ол серіктестік пен өзара құрмет қағидаттарына негізделеді.
«Біздің елімізді Орталық Азия халықтарымен тарихи тұрғыда тату көршілік, стратегиялық әріптестік, одақтастық, бауырластық достық және ынтымақтастық қатынастар байланыстырады. Байланыстарымыздың бірізді дамуына өзара құрмет пен сенімге негізделген достас мемлекеттер басшылары арасындағы жеке қарым-қатынастар кепіл болып отыр», – деді ол.
Оның сөзінше, мұндай тұжырымдар келіссөздерде, саммиттерде және басқа да ресми іс-шараларда «сан мәрте» айтылған. Сондай-ақ дипломат ТМД мен ҰҚШҰ аясындағы тұрақты өзара іс-қимылға, соның ішінде қатысушы елдердің қауіпсіздік кеңестері хатшыларының кездесулеріне назар аударды. Айтуынша, аймақтық қауіпсіздік мәселелері дәл осы алаңдарда талқыланады.
«Дәл осы құрылымдар мен оларды басқарып отырған адамдар, сондай-ақ онда жұмыс істейтін көптеген сарапшылар біздің ортақ өңіріміздегі қауіпсіздік мәселелерін талқылайды», – деді Захарова.
Сонымен қатар ол жекелеген мәлімдемелерге емес, нақты әрекеттерге қарап қорытынды жасауға шақырды.
Захарова Ресейдің посткеңестік кеңістіктегі елдермен қарым-қатынасының сипатын айқындайтын бірнеше мысалды келтірді.
«Қаншама рет шынайы жанашырлық таныттық, қайғыға ортақтастық? Қаншама рет қуанышымызды бірге бөлісіп, ортақ жеңістер мен посткеңестік кеңістіктегі әріптестеріміз бен достарымыздың жетістіктеріне бірге қуана білдік? Қаншама рет күрделі, тығырыққа тірелгендей көрінген жағдайлардан бірлесіп жол таптық? Қаншама рет түсінбеушілікті еңсердік? Қаншама рет арандатушылар мен арандатуларға жауап бердік?» – деді ол.
Дипломаттың айтуынша, назар дәл осы жайттарға аударылуы тиіс, ал арандатулар мен жорамалдарға емес.
«Міне, осыған бағдар алу керек, ешбір жағдайда сүрінбеу және, тіпті, арандатуларға назар аудармау қажет», – деді Захарова.
Сондай-ақ ол ақпараттық кеңістікте арандату әрекеттері әлі де көп болатынына сенім білдірді.
«Өкінішке қарай, мұндай әрекеттер аз болмайды. Сондықтан шынайы шындықты көрейік те, қандай да бір жалған ақпарат пен фейктерге алданбайық», – деп түйіндеді дипломат.
Бұған дейін Латвия Ресей арнасын көрсетуді тоқтатқан еді.
