Алматы облысында кәсіпкерлерді «қорғауына» алғысы келген қылмыстық топ ұсталды
Олар кәсіпкердің 3,5 миллион теңгесін иемденіп алған
Алматы облысында Алматы қаласы мен өңірдің сауда базарларында «қорғауға» аламыз деп, кәсіпкерлерден ақшалай қаражатты бопсалайтын қылмыстық топ қолға түсті, деп хабарлайды Malim.kz.
Алматы облысы ПД мәліметінше, 27 мамырда Ұйымдасқан қылмысқа қарсы күрес басқармасына сондай қылмыстық топ туралы ақпарат түскен.
Жедел-іздестіру іс-шаралары барысында «маргиналды жастардың» қолынан зардап шеккен Алматы облысының 47 жастағы тұрғыны анықталды. Жәбірленуші 13 мамырда Қарасай ауданында белгісіз адамдар күш қолданып, одан 3,5 миллион теңгені иемденгенін хабарлады, деп жазды полиция департаменті.
ПД ҰҚҚКБ қызметкерлері Алматы облысы бойынша ҰҚКД-мен бірлесіп прокуратураның үйлестіруімен 25 шілдеде 31-36 жас аралығындағы ер адамдарды анықтап ұстаған.
Күдіктілер уақытша ұстау изоляторына қамалған. Олардың басқа ұқсас қылмыстарға қатысы бар-жоғы тексеріледі. Қазір тергеу жүріп жатыр.
Фото: Алматы облысы ПД
