«Үмітті ақтамадым». Елена Рыбакина жанкүйерлерінен кешірім сұрап, видеоүндеу жасады
Қазақстандықтардың басым көпшілігі Рыбакинаның жарыстан бас тартқанына наразылық білдірген.
Қазақстанның бірінші, әлемнің 4-ракеткасы Елена Рыбакина Париж Олимпиадасына қатысудан бас тартқаны белгілі. Ол денсаулық жағдайына байланысты олимпиадаға қатыса алмайтынын мәлімдеген еді. Алайда, қазақстандықтардың басым көпшілігі Рыбакинаның бұл шешіміне наразылық білдірген, деп хабарлайды Malim.kz.
Елена Рыбакина Қазақстан халқына және жанкүйерлеріне үндеу жасап, жағдайдың қаншалықты қиын болғанын жеткізуге тырысты.
“Құрметті жанкүйерлер, Отандастарым! Сіздерге Париждегі Олимпиада ойындарында Қазақстан құрамасы сапында өнер көрсете алмағаныма өзімнің қаншалықты ренжігенімді және өкінетінімді айтып хабарлаймын. Мен командамен бірге белсенді дайындалдып, өкінішке қарай, дәл жарыс басталар алдында сырқаттанып қалдым. Дене қызуым қатты көтеріліп, тыныс алуым да қиын болды, дәрігерлер маған кортқа шығуға қатаң тыйым салды”, – деді Елена Рыбакина.
Ресейден келген теннисші үмітті ақтамағаны үшін қазақстандықтардан кешірім сұрады.
“Барлық қазақстандық жанкүйерлерден ақталмаған үміттеріңіз үшін кешірім сұрағым келеді. Бұл жағдай жүрегіме өте қатты тиді, өйткені мен өз командаммен осы Олимпиада ойындарында жақсы нәтижеге қол жеткізу үшін көп дайындалдым және медаль жеңгім келді. Токиода өткен Олимпиадада мен медаль алуға өте жақын болдым және медаль алу менің үлкен мақсатым болып қала берді. Мен жақын арада кортқа шыға аламын деп үміттенемін. Барлық отандастарыма алғысымды жеткізгім келеді, өйткені әлемнің қай түкпірінде ойнасам да сіздер маған әрқашан айтарлықтай қолдау көрсетесіздер. Стадиондарда көк байрағымызды көріп әрқашан қуанамын. Көп рахмет және кортқа жақын арада ораламын деп үміттенемін”, – деді Елена Рыбакина.
Фото: ҚТФ
Байланысты жаналықтар
MalimBlocks
