Оңтүстік Кореяның бұрынғы қорғаныс министрі мемлекетке опасыздық жасады деген айыппен қамауға алынды
Мұның алдында президент әскери жағдай жариялағаны үшін халқынан кешірім сұраған еді
Бұрынғы қорғаныс министрі Ким Ён Хён Сеулдің шығысындағы уақытша ұстау изоляторына қамалды, деп хабарлайды ҚазАқпарат Yonhap агенттігіне сілтеме жасап.
Өткен аптада президент Юн Сок Ёл Оңтүстік Кореяда қысқа мерізімге әскери жағдай жариялаған. Содан кейін прокурорлар бұрынғы қорғаныс министрі Ким Ён Хёнді мемлекетке опасыздық жасады деген күдікпен қамауға алған.
Арнайы тергеу штабы Кимді тұтқындап, оның ұялы телефонын тәркілегенін хабарлады. Сәрсенбі күні қорғаныс министрі Ким Ён Хен кешірім сұрап, отставкаға кетуді ұсынған еді. Президент экс-қорғаныс министрінің отставкасын қабылдаған.
Бұған дейін президент Юн Сок Ёлға мемлекетте әскери жағдай енгізбек болған әрекеті үшін импичмент жариялау туралы ұсыныс енгізілген. Сенбі күні кворумның болмауына байланысты ұсыныс қабылданбады. Соның арқасында президент қызметінде қалды. Дегенмен, Оңтүстік Корея еліндегі саяси жағдай толық тұрақтады деп әзірге айтуға келмейді.
Фото: Yonhap
