Қазақстан ең бақытты елдер арасында нешінші орында?

Қазақстан 20 наурызда жарияланған Әлемдік бақыт баяндамасы (World Happiness Report) рейтингінде 43-орынға жайғасты, - деп хабарлайды Malim.kz.

Жыл сайын жарияланатын World Happiness Report деректері бойынша, Қазақстан 43-орынды иеленіп, Өзбекстаныд 10 сатыға, Ресейді 13 сатыға, Қырғызстанды 32 сатыға басып озды. Осылайша, ел ТМД елдері арасындағы рейтингте көш бастады.
Еске салайық, 2024 жылы Қазақстан бұл тізімде 49-орында болған.

Әлемдік бақыт баяндамасы – 140-тан аса елдің деректері негізінде жасалатын жыл сайынғы рейтинг. Оны Gallup компаниясы, БҰҰ және Оксфорд университеті бірлесе жариялайды.

Бақыт деңгейі бірнеше негізгі критерий бойынша анықталады. Оларға жан басына шаққандағы ЖІӨ, әлеуметтік қолдау, күтілетін өмір сүру ұзақтығы, еркіндік, жомарттық пен азаматтардың мемлекеттік институттарға деген сенімі кіреді. Сондай-ақ, Gallup-тың ғаламдық сауалнамасы арқылы тұрғындардың өз өміріне қанағаттану деңгейі 0-ден 10-ға дейінгі межеде бағаланады.

Айта кетейік, премьер-министр Олжас Бектенов Қасым-Жомарт Тоқаевтың президенттік қызметінің 6 жылдығына арналған мақаласында кейінгі 6 жылда жан басына шаққандағы ЖІӨ 50%-ға артқаны атап өтілді. 2019 жылдан бері өмір сүру ұзақтығы 73 жастан 75 жасқа дейін ұлғайды. Жалпы өлім-жітім 7,8%-ға, ана өлімі 26,3%-ға, нәресте өлімі 15,8%-ға азайған.

Фото: Pixabay.com