Касспий жағалауында қырылған 2 мың итбалықтың шығыны 1,5 млрд теңгеге баруы мүмкін. Lada.kz жазуынша, ол Қызыл кітапқа енгізілгендіктен, бір өлексенің өзіне қылмыстық іс қозғалуы керек, деп хабарлайды Malim.kz.
Сайт жазуына қарағанда, Каспий теңізінің жағалауындағы жағдайға байланысты мониторинг жалғасып жатыр. Маңғыстау облысы бойынша «ECOJER» қауымдастығының өңірлік экологиялық кеңесінің төрағасы, Экология және табиғи ресурстар министрлігі Қоғамдық кеңесінің мүшесі Әділбек Қозыбақовтың мәліметінше, теңіз жануарларының өліміне байланысты келтірілген шығын көлемі есептелді.
«Жайық-Каспий облысаралық бассейндік балық шаруашылығы инспекциясының» маманы Андрей Руцкийдің айтуынша, инспекторлар күнделікті мониторинг жүргізу үстінде. 23 қарашадағы жағдай бойынша теңіз жағалауына жануарлардың өлекселері шығарылғаны байқалмаған.
Әділбек Қозыбақовтың айтуынша, Ауыл шаруашылығы министрлігінің 2017 жылғы бұйрығына сәйкес, бір итбалықтың құны 193 АЕК-ке (712 556 теңге) тең. Ал мұнда 2 мыңға жетіп тұр. Егер осы 2 мың итбалыққа көбейтсек, 1 425 112 000 теңгені құрайды. Каспий итбалығы 2020 жылы Қызыл кітапқа енгізілген, сондықтан біреуінің өліміне де қылмыстық іс қозғалуы керек.
Оқиғаның қайталанбауы үшін мамандар компаниялардың қызметінің ашықтығын қамтамасыз ететін тәуелсіз сарапшыларды тартуды ұсынады. Сондай-ақ, бұл мәселеге қоғамның назарын аудару, арнайы комиссия құрып, кінәлілерді заң жүзінде жауапқа тарту қажеттілігі айтылды.
Фото: Lada.kz
