Биылдыққа елімізде 41 есірткі жеткізу арнасы мен 16 зертханасы жойылған

1987 жылы 26 маусымда Біріккен Ұлттар Ұйымы осы күнді Халықаралық нашақорлыққа және есірткінің заңсыз айналымына қарсы күрес күні деп жариялады. 

Ұлттық қауіпсіздік комитетінің мәліметі бойынша, 2024 жылдың басынан бері комитет есірткінің заңсыз айналымына қарсы іс-қимыл бойынша 96 операция, оның ішінде 23-ін шет мемлекеттердің құзырлы органдарымен бірлесіп жүргізген. Нәтижесінде 24 халықаралық және 17 аймақтық есірткі жеткізу арнасы, сондай-ақ, 16 жасырын есірткі зертханасының қызметі жойылған.

Заңсыз айналымнан 1,3 тоннадан астам есірткі құралдары мен психотроптық заттар, 4,6 тонна көкнәр сабанының шикізаты және синтетикалық есірткі жасау үшін пайдаланылатын 13,6 тонна химиялық реагенттер алынған.

«Қара нарықта» алынған есірткінің құны шамамен 17 млрд теңгеге бағаланады, ал айналымға жіберілген көлем шамамен бір реттік 5 млн дозаны құрайды, деп жазды ҰҚК.

Комитет деректері бойынша қазақстандық және шетелдік 54 азаматқа қатысты сотқа дейінгі тергеулер жүргізіліп жатыр.

Сонымен қатар, ҰҚК Шекара қызметі халықаралық қатынас жолдарында есірткі құралдарын тасымалдаудың 200-ден астам әрекетінің жолын кескен. Заңсыз айналымнан 790 кг астам есірткі және психотроптық заттар алынған.

Фото: gov.kz