Қостанай облысында жылу қазандығы жарылысынан зардап шеккен адам көз жұмды
Науқас шұғыл түрде санавиациямен Қостанай облыстық ауруханасына жеткізілген болатын
Қостанай облысы Амангелді ауылында жылу қазандығы жарылысынан зардап шеккен тұрғын көз жұмды,- деп хабарлайды Malim.kz.
1969 жылғы азамат 7 қараша күні сағат 22:30-да ол шұғыл түрде санавиациямен Қостанай облыстық ауруханасына жеткізілген болатын.
"Өкінішке орай, бүгін сағат 01:00-де Амангелді ауданындағы қазандықтың жарылуы салдарынан зардап шеккен азамат алған жарақатынан есін жимай, қайтыс болғанын хабарлаймыз. Тасымалдау кезінде науқаспен бірге реаниматологтар мен нейрохирургтар бригадасы болған. Жансақтау бөліміне жатқызылғаннан кейін науқас медициналық хаттамаға сәйкес емделді. Марқұмның отбасы мен жақындарына қайғыларына ортақтасып, көңіл айтамыз",-делінген Қостанай облыстық әкімдігінің хабарламасында.
Айта кетейік, 6 қараша күні Қостанай облысына қарасты Амангелді ауылында мәдениет үйінің бөлек орналасқан қазандығы жарылып, ғимарат қирап қалды. Облыстық ТЖД баспасөз қызметінің мәліметінше, үйінді астынан 55 жастағы ер адам құтқарылды. "Аман-су" мемлекеттік коммуналдық кәсіпорнына қарасты N2 қазандық 2 қабатты үш тұрғын үйді және әкімшілік ғимараттарды (сот, мұражай, мәдениет үйі) жылу энергиясымен қамтамасыз етеді. Сол қазандықтағы 2022 жылы орнатылған жылу қазандығы жарылып, оқыс оқиға болды.
Фото: egemen.kz
