Семейде танымал дәрігер өз үйінде өлі табылды, - деп хабарлайды Malim.kz тілшісі.
21 сәуірде полицияға қала шетіндегі бау-бақша үйінен 72 жастағы әйелдің мәйіті табылғаны жөнінде хабар түскен. Оның денесінде зорлық белгілері байқалған.
Шығыс Қазақстан облыстық Полиция департаментінің мәліметінше, күдікті қолға түсті.
"Бұл дерек бойынша ҚР Қылмыстық кодексінің 99-бабы (адам өлтіру) бойынша қылмыстық іс қозғалды. Күдікті уақытша ұстау изоляторына қамалды", – деп нақтылады ШҚО ПД баспасөз қызметі.
Қазір іс бойынша жан-жақты, толық және объективті тергеу жүргізу үшін қажетті тергеу әрекеттері жүргізіліп жатыр.
Қайғылы оқиға туралы Өскемен қалалық мәслихатының бұрынғы депутаты Денис Данилевский өзінің Facebook-парақшасында жазды.
"Бұл жантүршігерлік жағдай 21 сәуірге қараған түні, дәл Пасха мерекесінде болған. Клавдия Ким қаладағы өз саяжайында қастандықпен өлтірілген. Кеше марқұммен қоштасу рәсімі өтті, оған жүздеген адам келіп, Клавдия Кимге соңғы рет құрмет көрсетті”, – деп жазды ол.
Ол өзінің Клавдия Киммен 1999-2003 жылдары екінші шақырылымдағы мәслихат депутаты болғанын атап өтті.
"Не үшін өлтірді? Ол кімнің жолын кесіп кетті? Керемет дәрігер, ұйымдастырушы, басшы кімге кедергі келтірді? Қылмыстың ресми түрде мән-жайын білмейміз. Бейресмм ақпаратқа сәйкес, марқұмға бірнеше рет пышақ жарақатын салған. Қылмыс Клавдия Ким үйінде жалғыз қалғанда жасалған. Қарт адамның өмірін қию неге керек болды екен? Әлде 90-жылдар қайталанып жатыр ма", – делінген жазбада.
Фото: Денис Данилевский Facebook-парақшасынан
