Қуандық Бишімбаевтың ісі бойынша сот отырыстарынан ашық онлайн-трансляция ұйымдастырылады. Бұл туралы Жоғарғы соттың коммуникация бөлімінің меңгерушісі Перизат Сәдуақас хабарлады.
- Өздеріңізге мәлім, Қуандық Бишімбаевқа қатысты сот талқылауына қоғамның қызығушылығының артқанын ескере отырып, осы іс бойынша ашық сот отырыстарынан ашық онлайн-трансляция ұйымдастыру туралы шешім қабылданды. Осылайша, онлайн-трансляция арқылы кез келген адам, соның ішінде БАҚ өкілдері бұл сот процесінің барысын бақылай алады. Бұл шешім сот талқылауының ашық әрі жариялы болғанын және жалғасатынын білдіреді, - деп жазды ол.
Сондай-ақ, процеске қатысушылардың көптігін ескере отырып, отырыстан онлайн-трансляция жүргізілетін қосымша екі зал ұйымдастырылды.
Сондай-ақ оқыңыз: «Бәрін сот шешеді»: Бишімбаевтың анасы қандай үкім әділ деген сұраққа жауап берді
Бүгін Астана қаласының Қылмыстық істер жөніндегі мамандандырылған ауданаралық сотында Қуандық Бишімбаевтың ісі бойынша алқабилер алқасына кандидаттарды іріктейтін жабық отырыс басталды. Отырыста 12 адамнан тұратын (10 негізгі және 2 қосалқы) алқабилер алқасы құрылады.
- Алқабилерді іріктеуден кейін бірден Жоғарғы Соттың ресми аккаунттарында алқабилерді іріктеу нәтижесі туралы БАҚ-тың қатысуымен ашық режимде келесі сот отырысының күні мен уақыты көрсетілген баспасөз хабарламасы жарияланады, - делінген хабарламасында.
Перизат Сәдуақас онлайн-трансляцияның сілтемесі де қоса жарияланатынын да ескертті. Сонымен қатар, сот залының сыйымдылығына байланысты тек 10-15 оператордың кіруіне рұқсат берілді.
ФОТО: ИНТЕРНЕТТЕН
