Қазақстандағы әлеуметтік желіде Ресей азаматтарының заңсыз алған жеке сәйкестендіру нөмірлері (ЖСН) жойылып жатқаны туралы ақпарат тарады. Ішкі істер министрлігінің (ІІМ) Көші-қон қызметі комитеті бұл ақпаратты растады, бірақ кейбір түсіндірмелер қосты, деп хабарлайды Malim.kz Tengrinews.kz сайтына сілтеме жасап.
Көші-қон қызметі комитетінің төрағасы Аслан Аталықовтың айтуынша, кейбір шетелдіктердің ЖСН рәсімдеу кезінде заңбұзушылықтар анықталған. Бұл жағдайлар тексеріліп жатыр.
"Біз рәсімдеу тәртібін бұза отырып ЖСН алған адамдардың нөмірлерін жойдық. Қазір тергеу жүріп жатыр. Қандай бап бойынша тергеліп жатқанын айта алмаймын, өйткені бұл – тергеу департаментінің құзыретінде. Тергеу аяқталғаннан кейін тиісті түсініктеме беріледі. Бірақ әзірге тергеу құпиясы бар, тексерулер жалғасуда", – деді Аталықов.
Желіде тараған ақпаратқа сәйкес, ЖСН-ді қашықтан рәсімдеуге екінші деңгейлі банктердің бірі қатысқан болуы мүмкін. Қазақстан заңнамасына сәйкес, ЖСН алу үшін өтініш беруші жеке өзі қатысуы керек, сондықтан қашықтан рәсімдеу заңсыз саналады. Аталықов нақты қай банк екенін атаған жоқ, бірақ мұндай 10-нан астам жағдай анықталғанын айтты.
ІІМ деректеріне сәйкес, биыл Қазақстанда 9 мың ресейлік ЖСН алған. Ал тұрақты тұруға рұқсатқа ие Ресей азаматтарының саны – 87 мың.
Өткен жылы Қазақстанда 435 408 шетелдік ЖСН рәсімдеген, олардың ішінде:
- Ресей азаматтары – 233 013,
- Өзбекстан – 121 719,
- Қытай – 25 654,
- Тәжікстан – 13 846,
- Қырғызстан – 9 308.
Қазақстан заңнамасына сәйкес, ЖСН белгілі бір жағдайларда жойылуы мүмкін. Мысалы, рәсімдеу кезінде процедуралық бұзушылықтар анықталса немесе иесі елден көшіп кетсе.
Фото: pixabay.com
MalimBlocks
