Су тасқыны: Петропавлда зардап шеккендерге берілетін өтемақы екі есеге қысқартылған

Петропавлда су тасқынынан зардап шеккен тұрғындарға төленетін әлеуметтік төлемдерді 200 АЕК-тен 100 АЕК-ке дейін төмендету туралы жасырын шешім қабылданған, деп хабарлайды Malim.kz Петропавловск.news сайтына сілтеме жасап. 

10 сәуір күні Солтүстік Қазақстан облысының жұмыспен қамтуды үйлестіру және әлеуметтік бағдарламалар басқармасының басшысы Ринат Елжасов облыстың барлық аймақтарында және Петропавлда қиын жағдайға тап болған азаматтарға әлеуметтік көмек көрсету ережелері туралы хабарлаған.

Шенеунік су тасқынынан зардап шеккен Петропавл қаласының тұрғындарына 200 АЕК көлемінде өтемақы төленетінін айтқан.

14 сәуірде Солтүстік Қазақстан облысының әкімдігі де Telegram арнасында Петропавлда үйлерін су басқан тұрғындарға көрсетілетін көмек туралы ақпарат жариялап, тұрғындарға бір реттік 200 АЕК немесе 738 мың теңге көлемінде өтемақы төленетінін хабарлады.

Алайда біраз уақыттан кейін ақпаратқа өзгерістер енгізілген. Белгісіз себептермен өтемақы мөлшері екі есеге, яғни 200 АЕК-тен 100 АЕК-ке дейін қысқартылған.

Айта кетейік Петропавл қалалық мәслихатының 2024 жылғы 27 наурыздағы сессиясының шешімімен тұрғын үй иелеріне төтенше жағдай кезіндегі әлеуметтік көмектің мөлшері бір отбасына 100-ден 200 АЕК-ке дейін көтерілген. Бұл шешім 2024 жылғы 8 сәуірде жарияланды.

Президент Қасым-Жомарт Тоқаев Солтүстік Қазақстан облысына сапары барысында тұрғындармен кездесуінде әлеуметтік көмектің 100 АЕК көлемінде болатынын мәлімдеген және жиналғандардың ешқайсысы бұл ақпаратқа наразылық білдірмеген.

Басылымның мәліметінше, қазірге дейін прокуратура мен қалалық әкімдіктен жағдайға қатысты ешқандай түсініктеме келмеген. 

Фото: pkzsk.info