Әшімбаев арызын Аймағамбетовтің орнына Тоғжанов тыңдады

Сенатор білім саласына қатысты ескертулері мен сыни пікірін Білім және ғылым министрі Асхат Аймағамбетовке емес, вице-премьер Ералы Тоғжановқа айтты. Себебі бүгінгі отырысқа Аймағамбетов келмеген екен. Ол қазір президент Тоқаевпен бірге Бішкекте жүр.

Әшімбаев Дүниежүзілік банк пен өзге де ұйымдардың зерттеулері нәтижесінде отандық мамандардың дайындығы нашар екендігін және бәсекелестік қабілеті Экономикалық ынтымақтастық және дамуы ұйымындағы өзге елдер мамандарынан төмен екендігін баса айтты. Бұл әсіресе Жоғарғы оқу орындары мен колледж түлектеріне қатысты.

«Жалпы алғанда, алдағы жылдары еңбек және білім беру саясатын қарастырғанда біз осы жағдайларды ескеруіміз керек. Жоғарғы оқу орындары мен колледж түлектерінің біліктілігін арттырып, олардың сапалы жұмыс істегені керек. Қазіргідей өзін-өзі жұмыспен қамтушылар қатарын көбейтіп жүрмесін», - деді Әшімбаев.

Айта кетейік, қазір Қазақстанда штаттағы университет ұстаздары шамамен 200 мың теңгеден жоғары жалақы алуы тиіс. Ал колледж ұстаздарының жалақысы 80 мың теңгеден басталады. Алайда соңғы бір-екі жылда мектеп мұғалімдерінің жалақысы өскенінің әсерінен университет пен колледж мұғалімдері мектепке ауыса бастаған. Осыған байланысты Білім және ғылым министрлігіне қоғам тарапынан сыни пікірлер айтылған. Бірақ сенат спикері жас мамандардың біліктілігі туралы сөз қозғағанымен, оларға білім беріп жатқан педагогтер туралы айтқан жоқ.

Әшімбаевтың сынына іліккен тағы бір мәселе алдағы 10 жылдықта жас мамандарды саны көбеймек. Қазірдің өзінде әр жыл сайын еңбек нарығына 350 мың жас маман келсе, алдағы жылдары ол көбейе бермек. Себебі Қазақстанда туу көрсеткіші жыл сайын өсіп келеді. 2003жылы 247 мың бала дүниеге келсе, былтыр 446 мың сәби келген.