"Назарбаевтың адамы" 17 жылға сотталуы мүмкін
Экс-президенттің сенімді серіктерінің бірі саналатын қамаудағы Кәрім Мәсімовтің тағдыры не болады?
Кәрім Мәсімов 17 жылға сотталуы мүмкін. Бұл туралы Мәжілісте сөз болды.
Ұлттық қауіпсіздік комитетінің бұрынғы төрағасы Кәрім Мәсімовті тергеу жұмысы туралы Мәжілісте ҚР Бас прокуроры Берік Асылов айтты. Оған Мәжіліс депутаты Наталья Дементьева арнайы сұрақ қойды.
«Әлеуметтік желілерде депутаттарға халықтан көптеген сұрақ түсіп жатыр. Соңғы күндердегі ең маңызды мәселелердің бірі - «Егер Кәрім Мәсімовтің және Ұлттық қауіпсіздік комитетінің басқа қызметкерлерінің кінәсі дәлелденсе, олар қандай жазаға таратылуы мүмкін?» деген сұрақ. Осы жайтқа қатысты қылмыстық іс қай кезеңге келді?» - деді депутат.
Бас прокурор Мәсімов пен оның Ұлттық қауіпсіздік комитетінің төрағасы болып тұрғандағы үш орынбасарына, екі бөлімше бастығына қатысты бірнеше іс қозғалғанын, қазір олардың тергеу астында екенін айтты.
«Бұрынғы төраға мен оның орынбасарлары қамауда. Мемлекеттік опасыздық жасау, билікті күшпен басып алу үшін билікті асыра пайдалану және пара алу бойынша қылмыстық істер тергелуде. Олардың іс-әрекеттеріне құқықтық бағаны сот береді. Бірақ, алдын ала айтар болсақ, аталған қылмыстар үшін Қылмыстық кодекспен 17 жылға дейін бас бостандығынан айыру қарастырылған», - деді Асылов.
Әлеуметтік желілерде «Мемлекетке опасыздық жасады» деген айыппен 17 жыл мерзімді азырқанып жатқандар да бар.
Қазақстанда ең ықпалды қызметтер атқарған Мәсімов 2022 жылы 6 қаңтарда "мемлекетке опасыздық жасады" деген күдікпен изоляторға қамалған. Ол бұған дейін сарапшылар тарапынан Назарбаевтың биліктен кетсе де, ықпалын сақтап қалуында үлкен роль ойнайтын «Назарбаевтың адамы» ретінде аталып жүрген.
MalimBlocks
