Шұңқырдағы жазу: Ең жақсы өзгеріс – Омардың отставкасы
Өскемен қаласының автожолдарындағы шұңқырларда «Ең жақсы өзгеріс - Омардың отставкасы» деп жазылған тақтайшалар пайда бола бастады.
«Лучшая поправка – Омара отставка» деп жазылған тақтайшаларды кімнің қадап қойғаны белгісіз. Бұл бірнеше жыл бойы қаладағы сапасыз жол мәселесін көтеріп келе жатқан белсенділердің пікірі болуы мүмкін.
Айта кетейік, 2018 жылы Жақсылық Омар Өскемен қаласына әкім болып келген кезден бері қаладағы белсенділер оның отставкасын талап етіп, бірнеше мәрте қарсылық акцияларын өткізіп, 4 жылда 4 рет петицияға қол жинап, әкімді отставкаға жібере алмады. Облыс әкімі Даниал Ахметов 2019 жылы бір рет Жақсылық Омардың жұмысын сынға алған, одан кейін бір-бірін түсініп кеткен секілді. Өскемен тұрғындары соңғы рет осы жылдың 14 сәуірінде өткізген қарсылық акциясы кезінде Омармен қоса, Ахметовтің де отставкасын талап еткен.
11 мамыр күні Шығыс Қазақстан облысы мамандандырылған ауданаралық соты Омарға қаладағы автожолдардың қауіпсіз күйде сақталмағаны үшін, дәлірек айтсақ, сол қауіпсіздікті сақтауға тиіс ұйымға бақылау жүргізе алмағаны үшін, 50 АЕК (159 мың теңге) көлемінде айыппұл салған. Әкімнің үстінен арызды Өскемен тұрғыны жазған. Омардың осы айыппұлына қатысты пікір білдірген тікелей басшысы Даниал Ахметов «жұмыс істемейтін адам ғана қателеспейді. Мен Жақсылық Омарға сенемін» деген. Айта кетейік, бұл Жақсылық Омар осы қызметке келгелі бірінші айыппұл емес. Осыған дейін ол карантин кезінде спорт мектебіне маскасыз барғаны үшін 15 АЕК(43 755 теңге) айыппұл төлеген.
Жақсылық Омар көпшілікке бюджет қаражатын текке шашатын әкім ретінде танылған. 2021 жылы қала орталығындағы ағаштарды кесуге рұқсат беруімен қатар, қала әкімі аппаратына 4 жарым миллион теңгеге қаламсап алуға тапсырыс беріп, әкімдік кабинеттерін бөлуге 1 миллион теңге жұмсамақ болғаны талқыланған еді.
