Оңтүстік Кореяда орасан өрт болып, бірнеше адам қайтыс болған. Олардың ішінде қазақстандықтар да бар. Бұл туралы Malim.kz сайты СІМ-ге сілтеме жасап, хабарлайды.
СІМ баспасөз қызметінің хабарлауынша, өртте қайтыс болған адамдар әлі толық анықталып болмаған.
«2020 жылдың 29 сәуірі күні Оңтүстік Кореяның Ичхон қаласында құрылыс алаңындағы логистикалық қойма өртеніп, 38 адам қайтыс болып, 10 адам жарақат алды. Іздеу жұмыстары жалғасуда. Жергілікті биліктің хабарлауынша, қайтыс болған 38 адамның 29-ының аты-жөні белгілі болған, оның ішінде екеуі Қазақстан республикасының азаматы», - делінген СІМ баспасөз қызметі таратқан хабарламада.
Айта кету керек, Оңтүстік Корея – Қазақстан азаматтарының жұмыс іздеп көп баратын елдердің бірі. СІМ ресми өкілі ақпан айында ғана бұл мемлекетте 35 мың қазақстандықтың жүргенін, оның 12 мыңы заңсыз тұрып жатқанын айтқан.
