100 млрд алады: Мбаппе «Реал» ойыншысы атанды
Француз бір маусымда 15 млн еуро алып отырады.
![](/images/article-img/1600/22336-1717479128-m.jpg)
«ПСЖ» шабуылшысы Килиан Мбаппе ресми түрде «Реал» ойыншысы атанды, деп хабарлайды Malim.kz.
Мадрид клубы француздың қатарға қосылғаны туралы әлеуметтік желідегі парақшаларында жазды.
Шабуылшы «корольдік» клубқа еркін агент ретінде ауысты.
Француз шабуылшысы Килиан Мбаппенің Мадридтің «Реалымен» келісімшартының қаржылық талаптары да белгілі болды.
The Telegraph мәліметінше, 25 жастағы шабуылшы бір маусымда 15 миллион еуро алады. Яғни бес жылда 33,3 миллиард теңге алады деген сөз.
Сонымен қатар Мбаппеге 150 миллион еуро (66,7 миллиард теңге) көлемінде бонус беріледі, мұны ол бес жыл бойы алып отырады. Бұған имидждік құқық бойынша берілетін пайыздарды қосыңыз.
Естеріңізге сала кетейік, 2017 жылдан бастап Килиан «Пари Сен-Жермен» сапында өнер көрсетіп, Лига 1-де алты рет топ жарса, төрт рет Франция кубогында үздік шықты, сонымен қатар Франция суперкубогында үш рет және Француз лигасы кубогында екі рет үздік шыққан.
Француз шабуылшысы Мадрид клубында 9-нөмірмен өнер көрсетеді.
Соңғы маусымда Килиан Мбаппе барлық турнирде 48 матчқа қатысып, 44 гол соқты және 10 нәтижелі пас берді.
Transfermarkt.de сайты оны 180 млн еуроға бағалайды.
Фото: ТАСС