Шымкентте дәрігерлер жүрегі тоқтап қалған жүкті әйелді аман алып қалды
Қазір ол үйіне қайтайын деп жатыр
Шымкентте жүкті әйел шұғыл түрде №2 қалалық аурухананың перзентханасына жеткізілген, деп хабарлайды Malim.kz.
Денсаулық сақтау министрлігінің мәлімдеуінше, ол қатты қан кетіп, 3-дәрежелі геморрагиялық шок жағдайында келіп түскен.
Операциялық үстелде оның жүрегі тоқтап қалды, бірақ құрамында анестезиологтар, акушер-гинекологтар, операциялық мейіргерлер, трансфузиологтар бар дәрігерлер тобы жүрек-өкпе реанимациясын сәтті жүргізді, деп жазды министрлік.
Негізгі өмірлік функцияларын қалпына келтіргеннен кейін қан кетуді тоқтату операциясы жүргізілген. Сөйтіп, дәрігерлер бригадасы үйлесімді және жоғары білікті іс-қимылдарының арқасында пациенттің өмірін сақтап қалған.
Қазір босанған әйел мен сәбидің жағдайы қанағаттанарлық және олар үйіне қайтайын деп жатыр.
Фото: скриншот
