Ұшақ апаты: қазақстандықтар 800 литр қан тапсырды
Ақтаудың өзінде донорлық пункттерге 490 адам келген
Маңғыстаудағы ұшақ апатына байланысты екі күн ішінде қазақстандықтар еліміздің барлық өңірінен 800 литр қан тапсырған, деп хабарлайды Malim.kz.
Бұл туралы Денсаулық сақтау министрі Ақмарал Әлназарова әлеуметтік желіде жазды.
Оның сөзінше, Ақтау қаласының облыстық ауруханасында зардап шеккендерді алған жарақаттарының ауырлығы мен сипаты бойынша білікті іріктеу жүргізілген.
Ауыр жарақаттары бар адамдарды емдеуге жатқызудың алғашқы сын сағаттарында дереу құрылғыларға қосу, дәл диагноз қою және қажетті дәрі-дәрмектерді тағайындау маңызды болды. Біздің дәрігерлер өмірдің әрбір минуты қымбат болған күрделі де қиын жағдайда жоғары кәсіби деңгейде бұл тапсырманы орындады, деп жазды ол.
Министрдің жазуына қарағанда, қарапайым адамдар, әр түрлі өңірден келген отандастарымыз бей-жай қалмай, қиындыққа бірден жауап берген.
Екі күннің ішінде республика бойынша қан орталықтарында 1,5 мыңнан астам адам 800 литр қан тапсырды. Ақтаудың өзінде донорлық пункттерге 490 адам келді, Астанада – 600-ден астам адам, Шымкентте – 125, Ақтөбеде – 109, Жетісуда – 49, Қарағандыда-40, ШҚО-34 адам қан тапсырды және басқа өңірлерде де адамдар бұл апатқа бей-жай қараған жоқ, деп жазды министр.
Фото: instagram/akmaralalnazarova
Байланысты жаналықтар
MalimBlocks
